An nău rgop tâm nchră ta rmôt Mpeh trong nchrăp Luật N’gluh an dŏng siƀŭt quy phạm pháp luật (rgâl nkra), ôi 12/2, Kruanh Quốc hội Trần Thanh Mẫn lah rjăp, ân n’hao nău dơn kan tât dŭt bah ăp nhih pah kan nchih rgum luật. Luật N’gluh an dŏng siƀŭt quy phạm pháp luật aƀaơ geh 173 điều, Trong nchrăp Luật hao rblang dăn Quốc hội ta Rơh hop dja hôm 72 điều, hŭch 101 điều.

Ta nău mĭn rdâk njêng pháp luật tĭng trong rƀŏng ăp nău kan n’glĕ mpeh nău dơi kan bah Quốc hội ri Quốc hội quy định, ăp nău kan n’glĕ tât nău dơi kan bah Chính phủ, Chính phủ mbra quy định, Kruanh Quốc hội lah rjăp, nău rgâl nkra Luật n’gluh an dŏng siƀŭt quy phạm pháp luật lah n’gâng tơm an nău rdâk njêng ăp luật mhe, tâm ban kơt rgâl nkra, kơi ntop ăp luật đăp mpăn di n’glĕ nău dơi kan. Kruanh Quốc hội n’gluh 5 nkô̆ nău tơm tâm rgâl luật, tâm nê rƀŏng tât n’hao nău khlay kan nhih  pah kan tâm nău dơn tât dŭt nău kan, lơn lah nău dơn kan bah ăp bộ trưởng, kruanh n’gâng kan. Kruanh Quốc hội Trần Thanh Mẫn an lah, lah Luật dơi uănh an dŏng ta rơh hop dja, mbra nta trong dơh an nău rdâk njêng, ăp tŏng pháp luật tâm năm 2025 n’hanh nta trong dơh an năm kan Quốc hội khóa 16, năm 2026 – 2031.