Măng nơh (26/2), ta Ntŭk rgum tâm nchră dak bah dih, nkual ƀon têh Hà Nội hŏ ƀư Nar nkah ndray 70 năm Nar nai dak si Việt Nam (27/2/1955 – 27/2/2025) đah nkô̆: “Nău mprơ rnê tahen han dăng ao n’glang”. Nar ƀư nkah ndray tă bah Ban Tuyên giáo n’hanh Dân vận Trung ương, Bộ Y tế ƀư rgum.

Ntơh măt kruanh rđău kan Đảng, Ngih dak, Kruanh Quốc hội Trần Thanh Mẫn nchih nkah n’hanh mpư rnê nău nsrôih, nău n’groh an, nău gĭt blău bah nai dak si n’hanh n’gâng kan dak si hŏ dơi geh tâm bah ri aơ nơh. Kruanh Quốc hội Trần Thanh Mẫn lah rjăp, Đảng, Ngih dak he way ntrŏng, mât njrăng, but săm n’hanh n’hao ngăch dăng n’hâm suan an ƀon lan lah ngoăy tâm ăp nău dơn kan khlay, an ƀư lor bôk năP; hŏ n’hanh dôl dơi đă tĭng ƀư ăp tŏng, năn ngăch, ntrŭt ntrôl n’gâng kan dak si hun hao dăng tâm rơh mhe. Kruanh Quốc hội nsing nơm an lah, rmôt nai dak si, cán bộ, nuĭh kan n’gâng kan dak si tâm rnglăp tay, blău kan mhe, geh âk nău dơi lơn đŏng, way di đah săk ntơ “Nai dak si kơt me mbleh”, njêng “Nău mprơ rnê han dăng nuĭh tahen ao n’glang” ma ƀon lan way mpŏng kâp.