Lôch 6 nar n’gul pah kan, Rơh hop ndal tâl 9, Quốc hội khóa 15 hŏ wat jêh nkô̆ bôk nău kan ndơ̆ luh. Lah ta rơh mpôch dŭt rơh hop, Kruanh Quốc hội Trần Thanh Mẫn lah rjăp: ăp nău n’glêh an hŏ dơi Quốc hội uănh an dŏng lah năn ngăch, khlay di, uănh trong jong, ntŭk nsing di bah Đảng, Ngih dak.

Rơh hop dja, Quốc hội mĭn uănh, n’gluh an dŏng 4 luật, uănh an dŏng Nghị quyết mpeh nkra du đêt nkô̆ nău geh tât dăp rgum nuĭh kan ngih dak n’hanh 4 nghị quyết gay tĭng ƀư dăp rgum nuĭh kan bah Quốc hội, Chính phủ; uănh an dŏng 6 Nghị quyết gay ntrŭt ntrôl hun hao wăng sa- rêh jêng kon nuĭh n’hanh ăp trong tĭng, trong kơl mha êng đah du đêt trong nchrăp kan, ntŭk kan khlay gưl neh dak. Kruanh Quốc hội Trần Thanh Mẫn lah rjăp, aơ lah n’gâng ntơm khlay tâm rnôk rdâk njêng pháp luật, geh nkô̆ dŭt khlay rhŏ dŏng an rơh dăp rgum, glêh tam nuĭh kan bah lam trong kan  chính trị n’hanh ngăch droh rklaih jêr jŏt, kŏ kol mpeh trong đă tĭng ƀư, trong kơl, njêng đăt ndal gay ƀư lôch jêh ntŭk ntô ndơ dŏng, ntik n’hao tơm ndơ, nta trong soih aih hun hao mhe an n’gor n’hanh lam dak.