Lơ 10/2, ta ngih kan Quốc hội, Bí thư Đảng bộ Quốc hội, Kruanh Quốc hội Trần Thanh Mẫn ƀư tơm nar rƀŭn tal bôk năp bah Rnâng kan rđau kan Đảng bộ Quốc hội năm kan 2020-2025. Tâm nar rƀŭn, ăp ntoh măt tâm ban nau rgop mbơh nchră geh tât nau ntrŭnh đă pah kan bah Rnâng kan rđau kan Đảng bộ Quốc hội, năm kan 2020-2025; nau pă kan pah n’hêl đah ăp Uỷ viên Uỷ ban Rnâng kan, Uỷ viên Ban Rnâng kan, nau ndâk ăp ntŭk kan ƀư du ntil kan tâm nchră, kơl an bah Đảng uỷ ndrel nchră nau ntrŭnh rơh rƀŭn tal bôk năp Rnâng kan rđau kan Đảng bộ Quốc hội.

Ntoh nau tâm nar rƀŭn nchră, Kruanh Quốc hội Trần Thanh Mẫn lah rjăp ăp đảng viên ân leo trong, ƀư kan nâp, rjăp, nsôih tâm ma nau kan ngăn mơ geh nau dơi, nkre đă lŏ ntrŭt dăng nau kan njrăng, rdâng sa khâm, mpŭng lir, n’hao nau tam bah nau kan mêt uănh ndrel mêt uănh bah kơi tâm Quốc hội. Nchrăp ăp nau dơi ân Đại hội Đảng bộ ăp gưl tâm Đảng bôk Quốc hội, gay rƀŏng tât Đại hội tal XIV bah Đảng. Mpeh nau rđau ƀư ueh nau kan chính trị, Kruanh Quốc hội đă lŏ rgum rđau, ƀư geh nau tam nau ndâk, ƀư jêh pháp luật năm 2025 ndrel rđau bah Tổng Bí thư Tô Lâm mpeh nau rgâl mhe nau kan ndâk njêng pháp luật, uănh aơ lah nau ueh tâm nau ƀư kan năm 2025, pơk trong ân Quốc hội gưl XVI, năm kan 2026-2031./.