24/3, ta Ngih Quốc hội, Kruanh Quốc hội Trần Thanh Mẫn ƀư tơm rơh rƀŭn bah Ban Thường vụ Đảng ủy Quốc hội an rgop mpeh Dự thảo Nău rgop an tâm nchră  kơp uănh tay, nkra rgâl, ntop tay Hiến pháp, pháp luật bah Ngih dak rhŏ an nău dăp tay n’gâng kan ƀĭt joet bah trong chính trị n’hanh Dự thảo mbơh mpeh trong kan lôch jêh trong ƀư rhŏ an nău dăp N’gâng kan ƀĭt joet bah trong chính trị. Ntoh ngơi ta rơh rƀŭn, Kruanh Quốc hội Trần Thanh Mẫn lah rjăp, aơ lah rơh rƀŭn tal 2, Ban Thường vụ Đảng ủy Quốc hội an rgop nău mpeh 2 nkô̆ nău aơ.

Tĭng nĕ, ăp nău khlay, lĕ dơi ƀư kloh na nê̆ rhăt jăp, mpơl an saơ ri mbra rgum lĕ ndơ̆ an dự thảo. Kruanh Quốc hội an gĭt, tĭng nău đă bah N’gâng kan Chính trị, nar njuăl an Văn phòng Trung ương dŭt ndăn gay mbơh an Bộ chính trị an rgop ntĭm rđău lor rnôk mbơh Rƀŭn nchră Trung ương 11 nchrăp tâm bôk khay 4/2025. Lơn lah, nu nău, nkô̆ nău pah kan dŭt rlăp, rnoh nău kan dŭt têh, geh tât lĕ đah nău kan bah âk ngih pah kan, rmôt kan tĭng đah nău ntrŭnh dơh, ngăch, dăp tay rmôt ƀĭt joet bah trong chính trị.