Ôi 4/4, ta Đại sứ quán Lào ta Hà Nội, Thủ tướng Chính phủ Phạm Minh Chính leo mpôl Ntơh măt Chính phủ dak CHXHCN Việt Nam tât an kao si, weh njăt wa Khamtay Siphandone – Kruanh ơm Đảng Ƀon lan Cách mạng Lào, Kruanh dak ơm, Thủ tướng ơm dak CHDCND Lào. Tâm mông nar huêng khlay, rngot klâng, Thủ tướng n’hanh ăp nuĭh tâm mpôl hăn hŏ an du mnĭt nhêp măt nkah gĭt n’hâm suan n’hanh n’groh an du  bông nău rêh bah wa Khamtay Siphandone an n’gâng kan cách mạng Lào, tâm ban kơt tâm boh tâm rnglăp mha êng Việt – Lào.

Nchih ta siƀŭt ntĭnh njăt, Thủ tướng Phạm Minh Chính mpơl nău rngot klâng jru ta năp nău roh bah du hê kruanh cách mạng rôih dăng, nuĭh băl têh n’hanh ndrăng băl du nuih n’hâm bah ƀon lan Việt Nam. Thủ tướng rnê âk ăp nău rgop têh kuâng bah wa Khamtay Siphandone tâm nău rdâk njêng n’hanh bun dăp nău tâm rnglăp têh kuâng, tâm rnglăp mha êng, tâm boh lam lĕ rngôch đah bar dak Việt Nam – Lào. Thủ tướng an gĭt, gay nkah wa Khamtay Siphandone, Đảng, Ngih dak Việt Nam hŏ n’glêh an nar wer lam dak tâm bar nar 4 – 5/4. Păng njuăl nău tâm pă nău rngot klâng jru tât Đảng, Ngih dak, ƀon lan Lào n’hanh rnăk wâl ur kon wa.