Kruanh Quốc hội Vương Đình Huệ mhe râng Sa nkra Ngih măy nkret njêng cà phê Sơn La ta xă Mường Bon, nkuăl Mai Sơn, n’gor Sơn La. Ngih măy Cà phê Sơn La geh dĭng lĕ rnoh ntuh kơl 260 rmen prăk, đah dăng 50.000 tấn cà phê rih/năm, tâm ban 12.500 tấn cà phê rlăi/năm. Đah ăp nău dơh đah trôk nar, neh ntu, tâm di an hun hao nkra njêng lŏ mir ndoh ndơ, rgum, mât têh, n’gor Sơn La lĕ rgum hun hao tơm sa play, tơm tao n’hanh cà phê Arabica.

Jêh rlău 30 năm hun hao tât aƀaơ n’gor geh rlău 20.000 ha tơm cà phê Arabica, geh 41,2% rnoh neh cà phê Arabica bah lam dak; lah n’gor geh rnoh neh tăm cà phê Arabica têh ngăn lam dak. Groi Bí thư rnâng kan n’gor ủy Sơn La Lò Minh Hùng an lah, nău ndơ̆ an dŏng ngih măy Cà phê Sơn La ta nkuăl Mai Sơn, n’gor Sơn La, tâm di đah nău nchrŏng hun hao wăng sa-rêh jêng n’hanh nău kan kơl lor wăch rgum ntuh kơl bah n’gor tâm lvang 2020-2025; lah an saơ kloh an nău ndơ̆ nău ntrŭnh bah Đảng, nău kơl bah Ngih dak lăp tâm nău rêh; dơi mpŏng mbra nsĭt tay nău uĕh têh an nuĭh ntuh kơl, mkra ăp nău ntŭl rlong, jăch ndăn tâm rnôk hun hao tơm cà phê bah n’gor.