Ta rơh tâm nchră, Kruanh Quốc hội Vương Đình Huệ rhơn Bangladesh mpeh ăp nău dơi geh dăch aơ, ngăn lah, GDP hun hao rlău 7% tâm năm tơm prăk 2021-2022, Bangladesh lĕ jêng dak tăch ndơ an dak bah dih têh tal 2 ta lam ntur neh mpeh ăp ntil ndơ nsoh n’hanh lah hăn lor bôk năp tâm nău rdâk njêng ăp ngih máy ueh nđir.

Kruanh Quốc hội lĕ mbah rhơn Bangladesh ƀư dơi rơh săch kruanh lĕ rngôch tât atay, ƀư tĭng dơi “Nău mpŏng uănh 2041”, ndơ̆ Bangladesh jêng ngih dak ueh mhe n’hanh gĭt blău ta năm 2041 di rơh kahgĭt 70 năm njêng ngih dak. Bar hê nuĭh leo kan lah na nê̆ uănh khlăy tâm boh tâm rnglăp way ơm Việt Nam- Bangladesh; lĕ tâm nchră n’hanh tâm ban ŭch du đê̆ trong kan têh gay ma ndơ̆ tâm boh tâm kơl 2 dak hao du njoat mhe.

Kêng măng lơ 21/9, ta ntŭk kan Học viện Ngoại giao bâh Bangladesh, kruanh Quốc hội Vương Đình Huệ, Quốc vụ khanh n’gâng kan nchră nău đah dak bah dih Bangladesh, Đại sứ Việt Nam ta Bangladesh Nguyễn Mạnh Cường lĕ koh bok sa nkra ntŭk pla n’hơ 50 năm tâm boh tâm rnglăp way ơm n’hanh tâm kơl Việt Nam- Bangladesh yor Thông tấn xã Việt Nam leo ƀư.