Kêng măng 15/9, di rnôi rƀŭn Nghị sĩ mom tâm lam dak tal 9, Kruanh Quốc hội Vương Đình Huệ hŏ vơt Groi Kruanh Quốc hội Algeria Monder Bouden. Kruanh Quốc hội Vương Đình Huệ lah rjăp, Việt Nam ndrel Algeria lah 2 dak tâm dăch bah ơm. Việt Nam tŭng trong tâm nchră bah dih êng, ƀư tơm, tâm dăch đăp mpăn, tâm boh ndrel hun hao. Tâm nar mâp, bar rđau kan tâm ban nau lah rjăp, bol ma Việt Nam ndrel Algeria gŭ ngai, yơn geh nau tâm boh tâm dăch ngăn. Rơh tât, bar dak ân geh ntrŭt dăng nau tâm boh mpeh nau kan văng sa, tăch rgâl.

Groi Kruanh Quốc hội Algieria lah rjăp, Algeria mra ntung njŏ, ƀư trong mpông gay Việt Nam tâm rnglăp tâm ntŭk tăch ndoh ndơ bah Châu Phi. Kruanh Quốc hội Vương Đình Huệ lah rjăp, Việt Nam mro ƀư ntung nthoi gay Algeria lăp tăch ndơ tâm ASEAN. Groi Kruanh Quốc hội Algeria Monder Bouden rnê ngăn nau tâm nchră “N’hao nau dơi mrô ân druh ndăm”, Lễ ntơm ƀư, rƀŭn dĭng lĕ bah rơh rƀŭn mom lam ntur neh tal 9. Rmôt kan mom Quốc hội Algeria geh ăp nau rgop ueh ngăn tâm nau kan aơ./.