Ta Jay Quốc hội, Kruanh Quốc hội Vương Đình Huệ hŏ wơt Đại sứ dak Cộng hòa dân chủ Nhân dân Lào ta Việt Nam Sẻng-Phết Hùng-bun-nhuông. Kruanh Quốc hội Vương Đình Huệ rnê âk nău  khlay kan bah đại sứ tâm bah ri aơ hŏ geh  âk nău rgop gay ntrŭt ntrôl lơn đŏng tâm  boh tâm rnglăp têh kuâng, tâm boh mha êng lam lĕ rngôch, geh du nău mha êng lam ntŭr neh lah nsum n’hanh  tâm boh đah bar Quốc hội lah êng.

Lơn lah, rlău ma trong kan rơh mâp way ăp năm đah bar Bộ Chính trị n’hanh rơh hop way ăp năm bah bar Ủy ban tâm boh bar Chính phủ bar dak ri mhe aơ, “Rơh mâp gưl têh Việt Nam-Campuchia-Lào” đah Kruanh rđău kan pe Đảng hŏ geh nău dơi uĕh lăng. Bah meng nê, bar ding hŏ geh âk trong kan mhe dơi njêng. Tâm nê, geh trong kan tâm boh pe Kruanh Quốc hội Campuchia-Lào-Việt Nam mbra dơi ƀư tâm nchră gưl têh Quốc hội Campuchia-Lào-Việt Nam lor bôk năp ta Lào tâm kêng dŭt năm aơ. Nkhêp geh rnôk dja, Kruanh Quốc hội lah uĕh Quốc hội Lào đă mpôl ntơh măt râng Tâm nchră Nghị sỹ mom lam ntŭr neh tâl 9 tă bah Quốc hội Việt Nam đăng cai ƀư; mpơl nău rhơn rnôk Quốc hội Lào lah dak Kruanh AIPA 2024 hŏ ndrel Tổng Thư ký AIPA mâp măt ăp nghị sỹ mom AIPA ta tâm nchră mhe aơ./.