Tâm rnôk hăn khâl ngăn Bulgaria, măng aơ, tĭng mông Việt Nam, Kruanh Quốc hội Vương Đình Huệ hŏ tât Nkual ƀon têh Burgas. Ta aơ, Kruanh Quốc hội wơt Kruanh nkual ƀon têh Burgas Dimitar Nikolov n’hanh ăp Groi kruanh nkual ƀon têh, kruanh rđău kan ăp Ban bah Nkual ƀon têh. Kruanh Quốc hội lah rjăp, tâm rlău 73 năm aơ, Việt Nam way ŭanh khlay nău ŭch tĭng kơl bah Bulgaria lah nsum n’hanh bah Nkual ƀon têh Burgas lah êng.

Tâm rnôk hăn khâl ngăn rơh dja, ta ăp rơh tâm nchră đah Kruanh Quốc hội, Tổng thống n’hanh Thủ tướng, ndrel ăp rơh mâp êng ƀa ƀă, bar ding tâm ban ŭch n’hao dăng tâm boh da dê, tâm boh ta lĕ rngôch ăp trong kan Đảng, Chính phủ, Quốc hội, tâm nđŭr ƀon lan đah ƀon lan,  n’gor đah n’gor. Kruanh Quốc hội hŏ mbơh gĭt đah Kruanh  nkual ƀon têh Burgas mpeh n’gor Quảng Ninh aƀaơ, aơ lah ngoăy tâm ăp n’gor geh nău hun hao dŭt ngăch bah Việt Nam; an gĭt, lôch hăn khâl dja mbra rđău đă n’gor Quảng Ninh ơm nthoi tay ăp nău kan đah bar ding; nkre dăn đă Kruanh  nkual ƀon têh n’hanh ăp nuĭh kan nsum tât khâl Việt Nam, khâl n’gor Quảng Ninh gay ntrŭt ntrôl tâm boh đah bar n’gor, lơn lah tâm trong kan pâl nđaih./.