Lôch rlău du năm an ƀư n'gâng kan ƀon lan 2 gưl, Lâm Đồng hôm nha geh âk nău wăk kol tâm nău mât uănh neh ntu. Bar pe jât rbăn ha neh nchrăp ƀư ndơ trôm neh bô-xít, titan rlŭ rlăk đah nkual ƀon lan gŭ, nkual ƀon têh n'hanh nău kan ndơ dŏng ntung trong; hang rbăn rnăk ƀon lan dôl gŭ rêh ta neh bri tăm si mô lah ta ăp nkual mô hŏ geh nchrăp ntŭk ƀon lan gŭ. Âk rnoh neh tuch tăm hôm nha tâm pit đah neh tuch tăm, neh tăm bri.

Wa Bon Yô Soan, Groi kruanh Ủy ban MTTQ Việt Nam n'gor Lâm Đồng an gĭt, Luật neh ntu năm 2024 n'hanh ăp sam ƀŭt ntĭm nti hŏ njêng nău rgâl uĕh, yơn nău ƀư tĭng hôm nha geh ăp nău mô hŏ di pháp lý n'hanh trong dŏng mô hŏ tâm ban, ngăn lah đah ăp nău hôm nha geh klen khan bâh ntơm:  " Ƀon lan ŭch Quốc hội, Chính phủ ndrel ăp N'gâng kan, ntŭk kan Trung ương lŏ kơp, ƀư jêh ăp nau ntrŭnh bah pháp luật mpeh neh ntu tĭng trong kloh rah vah, tâm ban, nơih dŏng, nkre geh nau kan rklaih đah ăp nau tât đah nau ơm geh jŏ jong der nau tât phong dôih, đăp mpăn nau dơi ndrel nau geh tâm di pháp luật bah ƀon lan.

Tĭng groi nđôi Rơh rƀŭn mô way ƀư bôk năp, Quốc hội khoá XVI, ƀon lan n'gor Lâm Đồng mpơl nău mpŏng rƀŏng trong kơl rgâl nkra Luật neh ntu năm 2024 bah Quốc hội n'hanh Chính phủ mbra pơk luh dơi tơm ndơ neh ntu an rơh hun hao mhe.

Đah rnoh khlay neh, ndơn kan n'gâng kan n'hanh nhih pah kan way kan n'gor Lâm Đồng dăn đă Ngih dak tâm ban ŭch trong leo kan, rƀŏng tât du rnoh khlay neh kloh rvah. Ndrel đah nĕ, ân ƀư lôch rnoh mbrô neh ntu gay ma mbơh tơih na nê̆ nău lư, nta trong dơh an ăp nău tăch rgâl kơt tăch rgâl, ndơ dŏng neh n'hanh n'hŭch ntoh luh tâm mât uănh.

Wa Lê Trọng Yên, Groi kruanh rnâng kan UBND n'gor Lâm Đồng ntoh nău dăn đă mpeh trong sŏk mplơ̆ neh geh nar ton đah du đêt nău nchrăp ƀư, lơn lah nău nchrăp ƀư sŏk joi ndơ trôm neh. “Ăp nău nchrăp ƀư sŏk dŏng ndơ trôm neh ma he sŏk mplơ̆ neh nâp nâl ri dŭt jêr. Tă bah nuĭh ƀon lan bu lĕ geh sŏk mplơ̆ neh ri he an geh nău rêh an nuĭh ƀon lan ri mhâm ma he mô geh trong kơl, nău kơl mpeh sŏk mplơ̆ neh geh nar ton. Nău rgâl mhe Luật neh ntu sŏk mplơ̆ neh geh nar ton mbra hŭch dơi nău trok tâm ntop kơl ntŭk gŭ mhe n'hanh hŭch dơi prăk dŏng kan bôk năp mpeh rnoh khlay alumin".

Khoa Điềm/VOV - Tây Nguyên