Ƀư tĭng nău ntĭm đă bâh groi Thủ tướng Trần Hồng Hà ta rơh rƀŭn nchră trực tuyến tal 31 rnâng kan ntĭm leo ngih dak mpeh nău kan njrăng rdâng sŏk dŏng ndơ tui ka mô tâm di, mô geh mbơh tơih n’hanh mô geh nău ntrŭnh IUU, Uỷ ban nhân dân n’gor Lâm Đồng mhe geh săm ƀŭt ntrŭnh đă ăp ntŭk kan, n’gâng kan ta ntŭk mbơh tơih răng dăng ăp trong kan mât uănh, uănh nđôi na nê̆ duk ka mô geh tŏng nău dơi pah kan. Uỷ ban nhân dân n’gor Lâm Đồng đă ntŭk kan tuch tăm n’hanh ntŭk gŭ rêh ƀư leo kan, ntĭm đă Chi cục Thuỷ sản n’hanh gôl dak lêng ngăch ndăn mbơh kơp, nchih săm ƀŭt tŏng ăp duk ka mô dơi hăn tâm dak lêng joi ka ta ăp ntŭk kan xã. Nău kơp rnoh geh ăp rnoh mbrô mbơh dăn duk mpan hăn nsong, ntơ săk duk, rnoh mbrô VNeID, ntŭk gŭ n’hanh mbrô điện thoaị tâm ôp  njoăl tât ntŭk kan ta lơ 26/2/20296 gay ma ƀư mât uănh, mât njrăng na nê̆. Kơp tât dŭt khay 2/2026, lam n’gor Lâm Đồng geh 8.207 duk joi ka, tâm nĕ geh 7.234 duk mô geh săm ƀŭt hăn nsong, geh rlău 88%, 973 duk mô tŏng dơi hăn nsong lĕ geh nchih săk mât uănh, mât njrăng na nê̆ n’hanh mô an hăn ta dak lêng.