Rgum nchră geh nău tât râng bah nuĭh ntơh măt ăp ngih pah kan mât bôk kan Trung ương, ta ntŭk, trong kan ntrŭt nsôr pah kan lŏ mir, ndrel ăp hợp tác xã, doanh nghiệp nkra njêng, nkret njêng, tâl dŭng n'hanh tăch n'gluh ndơ tuch tăm. Ăp đại biểu rgum tâm ôp ăp nău ŭch geh mhe tâm mât uănh, mât dŏng rnoh mbrô nkual tăm, rnoh mbrô ntŭk tâl dŭng; nkre rblang ăp jêr jŏt tâm dăp rgum nkra njêng, mât kân ndơ dŏng tuch tăm, joi tu tơm n'hanh tâm rgop đah nkual tăm đah ntŭk tâl dŭng, doanh nghiệp tăch n'gluh.

Bâh nău ngăn pah kan jan sa, wa Nguyễn Thanh Sơn, Giám đốc HTX Nông nghiệp Đạ M'ri an gĭt, HTX geh 180 nuĭh kan ndrel, đah nklăp ma 450 ha sầu riêng. Nău jêr jŏt têh aƀaơ lah nău mât tăm đah ăp rnăk ê hŏ tâm ban, tâm rnôk ntŭk tăch rgâl ăp nar lơ ma uănh khlay mô dơn tât ndơ geh ƀư lôch nglĕ dŭt ma lĕ ma nău kơp dơn, nău mât tăm n'hanh nău dơi mbơh tơih bâh nkual tăm.

 "Nău ngăn bah ƀon lan kan lŏ mir he lah tuch tăm ăp nuĭh du trong êng êng, mô geh nuĭh tâm ban. Nkô̆ nău ndơ̆ luh ta aơ lah phâm ƀư tuch tăm. Hợp tác xã mpôl hên hŏ geh trong rƀŏng, ntĭm nti, tâm nchră, rlong ƀư; nău ŭch tât n'glĕ dŭt lah ƀư tuch tăm tĭng trong rƀŏng hữu cơ jŏ jong".

Nău ngăn tă bah HTX Đạ M'ri lĕ ntoh nău đă nar lơn ma âk tâm nău mât rnoh mrô tâm lam n'gor Lâm Đồng. Tât rnôk aơ, Lâm Đồng geh 1.611 mrô nkuăl tăm, tâm nê 1.094 mrô kơl an tăch luh lĕ geh dak rwăt dŏng; ndrel 547 mrô ntŭk nklâm tâl. Dôl uănh, geh tât 173 mrô nkuăl tăm đah rlau 3.600 ha ndrel 61 mrô ntŭk nklâm tâl lĕ geh ntrŭnh mô hôm dŏng mô lah sŏk lơi.

Ăp rnoh mbrô aơ an saơ, rnôk samƀŭt rhăch nău pă an keh mrô nar lơn ma dơh, tâm pă gưl n'hanh mrô, rgum tơm mât uănh an rgâl dăng tât nău mât uănh nău dơi jêh pă an, n'hao dăng groi nđôi n'hanh n'hao nău dơn kan bah tĭng nuĭh tơm tâm rêng nkra njêng.

Wa Lê Quốc Thanh, Giám đốc Ntŭk rgum ntrŭt nsôr tuch tăm gưl neh dak lah na nê̆, rnoh mbrô nkual tăm mhe knŭng lah nău dơi bôk năp; nău khlăy ngăn geh ta ntrong kan mât tăm, nău kơp dơn dŏng, ndơ dŏng kan n'hanh lĕ rngôch rnoh mbrô geh tât nău pah kan jan sa."Rnoh mbrô nkual tăm mô hŏ nkoch nău du ntil ôh, păng mhe knŭng lah nău dơh dơm. Êng ƀon lan kan lŏ mir đah moh trong ƀư, dŏng moh rnoh di, dŏng moh trong ƀư, ndơ dŏng mhâm ƀư ri lĕ rngôch ăp nău lư bah rnoh mbrô nê mư nkoch nău uĕh kah ndơ".

Bah ăp nău n’gluh an, tâm nchră dăn đă n'hao tâm rgop đah ƀon lan kan lŏ mir, hợp tác xã, ntŭk tâl dŭng n'hanh doanh nghiệp tăch n'gluh; ntrôl dăng kơt dŏng công nghệ mbrô tâm mât uănh rnoh mbrô, joi tu tơm, mbơh njrăng nău tât; nkre n'hao săk kah uĕh nkual tăm gay tŏng đah nău ŭch geh nar lơn ma âk bah ăp ntŭk rwăt n'glăp.