Ôi 26/2, ta nkual ƀon têh Pleiku, n’gor Gia Lai, Quân đoàn 34 kan nsum đah Báo Quân đội Nhân dân ƀư tâm nchră nkô̆ “Lơh dơi Tây Nguyên – Ntơm bôk trong an nău dơi lam lĕ rngôch”. Nar ƀư lah nău  kan khlay tâm rêng kan nkah ndray 50 năm Nar rklaih luh miền Nam, dơn ngoăy neh dak (30/4/1975 - 30/4/2025), gay năl di nău têh khlay, nkô̆ hôr bah trong lơh dơi Tây Nguyên tâm rơh tâm lơh mprơh Mỹ kơl neh dak.

Ta rơh tâm nchră, ăp kruanh mât bôk tahen, nuĭh khoa học n’hanh ntơh măt ăp nhih pah kan, đơn vị mpeh Binh đoàn Tây Nguyên (tơm njêng lah Quân đoàn 3) hŏ rblang luh ndơ ƀư jêng geh nău dơi têh dja. Ntơm bah nău rđău đă chrat ang bah Đảng, nău blău đă miăt jŏ jong, tât nău blău trong lơh mhe bah Mpôl tahen ƀon lan Việt Nam. Rơh tâm nchră mô dơn nkah tay ăp nău dơi rgŭt n’gĭng ma hôm rhuăt luh nău tă ơm gĭt khlay an rơh rdâk njêng n’hanh mât njrăng neh dak aƀaơ; rgop rlăch ndăng rdâng lơh tay ăp nău mplư rlăm nkoch nklă lịch sử; rdâk nâp tay nău nsing nơm tâm nău rêh neh dak let năp tay. Nkre, aơ lah rnôk gay ntĭm nti nău way ơm cách mạng, rdâk tay nuih n’hâm n’hao êng săk rnoi nuĭh n’hanh nuih n’hâm rŏng dak, lơn lah đah rơh mom ndăm bah kơi tay.