Bâh ăp ntŭk tăch ndơ way ơm tât ntil ndơ tăch rgâl ta điện tử n’hanh mạng xã hội, âk ntil ndơ geh ndra rlăm lah rsoăn rlêng Khánh Hoà geh tăch dŭt âk. Mô dơn geh dŏng nău ntơ tâm ban, ăp nuĭh aơ hôm nha ƀư ntô dŭng tâl ndơ lĭr dŭt tâm ban n’hanh logo gay ma rlăm nuĭh dŏng. Tĭng nău mbơh bâh Công ty ƀư rsoăn rlêng Khánh Hoà, aƀaơ geh 122 doanh nghịêp dŏng mô geh mbơh nău ntơ “Rsoăn rlêng Khánh Hoà”; 42  ntŭk kan mbơh dăn nău ntơ tăch rgâl n’hanh 55 ntŭk mbơh dăn nău ntơ geh nău ƀư tâm ban kơt lĕ geh mbơh dăn tăch rgâl. Tăch ta ntŭk mạng lĕ geh ntoh klâp ma 280 ntơ facebook n’hanh website geh nău mbơh ndra ma kơt.

Tĭng ăp nuĭh way kan, rnôk ma ndơ geh ndra ƀư rlăm âk, khuch khat âk mô dơn đah doanh nghiệp ma hôm nha geh nău tât mô ueh tât ăp nuĭh rong sĭm rlêng n’hanh ăp ntŭk ƀư rsoăn sĭm rlêng ngăn. Nuĭh dŏng mô hôm geh nău knơm mbra mô hôm geh âk nuĭh rvăt, khuch tât nău ueh ntil ndơ n’hanh nău dơi ta ntŭk tăch rgâl. Wa Trần Triều Hưng, N’gâng kan mât uănh ntŭk tăch rgâl n’gor Khánh Hoà an gĭt, âk ntil ndơ geh ƀư tih kơt lah ƀư tâm ban ngăn, ndơ nchih ndơ lir n’hanh geh nchih ntŭk ƀư mô di ngăn đŏng gay ma njêng nău knơm đah bu năch. “Nău ƀư tih ndŭt âk ngăn lah nău ntơ “Rsoăn sĭm rlêng Khánh Hoà”, aơ lah nău ntơ bâh công ty lĕ geh pă an kan an tăch rgâl ta lam dak. Mhe nơh, hên mhe geh saơ âk ntil ndơ ƀư tâm ban, ƀư ntŭk êng yơn lah geh nchih rsoăn rlêng Khánh Hoà. Geh ăp ntil ndơ nchih lah ntŭk ƀư ta KHánh Hoà yơn hăn tât ta ntŭk  nchih ta ntô lĭr rĭ mô geh. Âk nuĭh dŏng ndơ lah rnôk bu răk n’hanh bu saơ rsoăn rlêng Khánh Hoà bu way geh mĭn tât rsoăn sĭm rlêng ntŭk ƀư ta Khánh Hoà n’hanh bâh Công ty ƀư rsoăn sĭm rlêng Khánh Hoà”.

6 khay bôk năm 2026, Công ty sĭm rlêng Khánh Hoà ƀư rlău 130 rkeh ntil ndơ,  nău geh bơu tât 1.700 rmen prăk, pă nău kan an bơi tât 3.900 nuĭh kan, gay ma an rnoh aơ saơ n’gâng kan ƀư rsoăn sĭm rlêng tâm rgop âk ngăn an n’gâng kan wăng sa ta ntŭk. Gay ma mât nău dơi nuĭh pah kan jan sa, ntŭk kan mât uănh ntŭk tăch rgâl n’gor Khánh Hoà n’hanh Công ty ƀư rsoăn sĭm rlêng Khánh Hoà lĕ geh ký tâm ton tâm rgop uănh năl, uănh nđôi ta ntŭk tăch rgâl, njrăng rmal nău tih mpeh dŏng ndơn ƀư bu ơm geh ƀư mô mbơh dăn.