Ôi nđaơ (4/3), ta Hà Nội, Văn PhòngKruanh dak ƀư rƀŭn mbơh nău ntrŭnh bah Kruanh dak mpeh an sĭt ơm gŭ ndrung năm 2025 nkhêp di 50 năm Nar rklaih đăp mpăn miền Nam, kơp dơn neh dak (30/4/1975-30/4/2025). Tĭng nău ntrŭnh bah Kruanh dak mpeh an sĭt ơm năm 2025, nuĭh an sĭt ơm năm 2025 geh: nuĭh dôl mhal tih dôih gŭ ndrung jŏ năm, nuĭh geh nchŭt dôih lôch săk lĕ dơi n’hŭch jŭr gŭ ndrung jŏ năm, nuĭh dơi an rluh mhal dôih gŭ ndrung.

Ntoh ngơi ta bôk nău kan, wa Phạm Thanh Hà, Groi Chủ nhiệm Văn phòng Kruanh dak mĭn lah, bah năm 2009 tât aƀaơ, Ngih dak lĕ ƀư 10 rơh an sĭt ơm nkhêp di nău ƀư têh, nar lễ têh bah neh dak, an sĭt ơm an bơi 100.000 nuĭh tih dôih geh năm mhal, pah kan, nti nsơm plơ̆ sĭt đah ntŭk gŭ rêh, kon nuĭh. Jêh ăp rơh an sĭt ơm lĕ đăp mpăn ăp nău đă chính trị, pháp luật, tâm rnglăp bah dih, dơi nuĭh ƀon lan tâm dak tâm ban ŭch n’hanh nău lư lam ntŭr neh uănh lah prêh; mĭn lah tay nău ntrŭnh, nău kơl êng bah Đảng n’hanh Ngih dak tâm nău ntrôl n’hanh mât njrăng nău dơi kon nuĭh du trong tâm ban, an lĕ rngôch ăp nuĭh ƀon lan, n’ăp ăp nuĭh dôl mhal gŭ ndrung. Đah ăp nău ntrŭnh an sĭt ơm bah Kruanh dak, âh rbăn nuĭh lĕ geh nău răm dơi kơl an, plơ̆ sĭt rgum đah rnăk wâl, nchrăp ƀư tay nău rêh.