Bộ Chính trị n’glêh an kơl dơm prăk nti an kon se nti bah gưl mầm non tât lĕ trung học phổ thông ta lam dak. Tâm rnôk tĭng ƀư ntơm bah bôk năm nti mhe 2025-2026 (jêng lah ntơm bah khay 9 năm 2025 let lơ). Âk me bơ̆ mpơl nău rhơn đah trong kơl mhe dja, yor rgop  hŭch đêt roh huach prăk nti bah oh kon he, lơn lah đah  ăp rnăk ta nkual ƀon lan, mpeh yôk yang, nău rêh wăng sa hôm jêr jŏt.

Geh 2 hê kon dôl nti mẫu giáo, ăp khay rnăk yuh Nguyễn Ngọc Quỳnh ta nkuâl Nam Đàn, n’gor Nghệ An ân roh nklăp 4 rkeh prăk nti n’hanh prăk sa nar an kon. Lĕ 2 hê ur sai ƀư công nhân, nsĭt geh wăng sa mô đăp mpăn jêng ăp khay ân dŏng sa dŭt mpêt ndrôm gay ntêm prăk an kon hăn nti. Yor kơt nê̆ rnăk tăng geh nău lư kon se nti mầm non n’hanh kon se tiểu học, trung học cơ sở, trung học phổ thông mbra dơi an nti dơm ntơm bah năm nti tât, yuh saơ rhơn yor mbra hŭch dơi du gâl prăk nti bah 2 hê kon:

Kơt rnăk hên ri ur sai luh kan sa prăk khay ma hŏ geh 2 hê kon, dơi kơl dơm prăk nti an kon se ri ur sai hên dơi hŭch du gâl mbăk anh jâk wăng sa an rnăk wâl, jêng gâp saơ dŭt rhơn rnôk geh trong kơl mhe.

Rhơn lah nuih n’hâm nsum bah lĕ rngôch ăp me bơ̆ đah nău n’glêh an mpeh rong dơm prăk  nti an kon se nti mầm non n’hanh kon se nti bah tiểu học tât trung học phổ thông bah Bộ Chính trị. Yuh Nguyễn Thị Hương ta phường Đồng Tâm, quận Hai Bà Trưng, Hà Nội nkoch:

Rnăk hên geh 2 mblâm kon, 1 hê nti trung học cơ sở, 1 hê nti jrô 10. Rnôk tât năm nti bah kơi tay dơi rong an dơm prăk nti ri he dŭt rhơn đŏng. Bol ma prăk nti bah ăp oh kon tâm 1 khay lah mô âk, yơn đah prăk gŭ rêh ta Hà Nội roh huach âk đŏng, ma rnăk hên dôl manh jay gay gŭ ri rgop an rnăk mpêt nkrem dơi du gâl prăk dŏng đŏng.

Hôm yuh Ngô Thị Mai ta nkuâl Thạch Thất, Hà Nội an gĭt:

Gâp dŭt rhơn đŏng. Hŭch dơi du đêt prăk kơp tâm 1 năm nti ri lah jêng du rnoh prăk têh, an rnăk hên mpêt nkrem dơi n’hanh dŏng ndơ êng ƀa ƀă an ăp kon. Nsĭt geh wăng sa ta nkual thôn ƀon kơt mpôl hên hôm dŭt đêt đŏng, jêng đah rnoh prăk nti kơt nê mpôl hên dŭt khlay.

 Ndrel rong dơm lĕ rngôch prăk nti bah mầm non, tiểu học, trung học cơ sở n’hanh trung học phổ thông, ăp kon se nhih nti ƀon lan njêng êng, tư thục mbra dơi kơl prăk nti bah nhih nti ngih dak tĭng quy định bah pháp luật đŏng; lĭn lơ prăk nti đah nhih nti ngih dak n’hanh ƀon  lan njêng êng, tư thục mbra tă bah rnăk wâl kon se nti nơm trok. Tĭng nô Trần Văn Nghĩa ta n’gor Hà Nam, trong kơl dja mbra rgop đăp mpăn geh nău tâm ban đah kon se nti nhih nti ngih dak n’hanh njêng êng bah dih:

 Kon se nti nhih nti bah dih ngih dak ri mbra dơi ntop kơl du rnoh prăk nti ri gâp saơ aơ lah du ntil nău dŭt rhơn, mbra dơi lah du ntil nău dŭt uĕh. Yor ngăn ma lah ri mbra nău ngăn roh prăk huach prăk nti mô dơn an gâp ma hôm an ăp me bơ̆ geh oh kon hăn nti nhih nti bah dih ngih dak đŏng, tâl bar gâp saơ lah mbra geh nău tâm ban lơn đah ăp mon nti nhih nti njêng êng bah dih n’hanh nhih nti ngih dak njêng.

Tĭng nchih rgum bah Bộ Giáo dục n’hanh Đào tạo, trong kơl dja mbra nsĭt geh nklăp 23,2 rkeh kon se nti bah mầm non tât tiểu học, trung học cơ sở, trung học phổ thông (mô hŏ kơp lĕ ma ăp kon se nti ta ăp ntŭk rgum ntĭm nti nău kan n’hanh ntĭm nti way mbro), mbra rgop hŭch bah ir mbăk anh jâk prăk kaih an ăp rnăk, tâm di đah trong kơl, trong nchrăp bah Đảng, Ngih dak đah ntĭm nti n’hanh tâm di đah trong rƀŏng nsum bah ăp dak hun hao.