Đah oh Nông Trà Vy, kon se nti jrâu 6A2 ngih săm ƀŭt nội trú rep gưl Tiểu học ndrel THCS Ea Rốk, geh nti tâm ngih săm ƀŭt aơ lah nau rhơn têh ngăn:‘Oh saơ nti tâm ngih săm ƀŭt nội trú ri rhơn ngăn, ngih săm ƀŭt kloh, ueh, nai ntĭm nti kon se, ŭch rŏng ngăn ma hên”.

Nau rhơn nê lơn ma geh nau khlay rnôk ngih săm ƀŭt aơ lah ntŭk nkra khlay ngăn bah N’gâng kan neh dak pă ân ƀon lan xã Ea Rốk, xã nkuăl 3 hôm âk nau jêr. Ntŭk aơ ntoh nau kơl an, hăn nsum bah N’gâng kan neh dak ndrel n’gâng kan tâm nkuăl tâm nau kan ntĭm nti, pơk trong nơih gay kon se geh hăn nti, rêh jêng ueh lơn ân kon se tâm nkuăl. Geh ndâk tâm khay 3 năm 2026, knŭng nklăp 6 khay nkra, ngih săm ƀŭt hŏ geh ndâk leo lăp dŏng tâm di rnôk lăp năm nti mhe khay 9 năm 2026, ơm lơn du năm nti rđil nau nchrăp bôk năp.

Ngih săm ƀŭt mhe têh ueh, nkual nội trú kloh ueh, dơh nơih kơl an ăp oh đăp mpăn. tâm ngih săm ƀŭt, geh tay mông nti ndrel pâl ndrel băl. Oh Trần Hà Thiên, nti sinh 7A2, an gĭt:

"Kon saơ lah rhơn rnôk dơi vô học ta ngih sam ƀŭt nội trú dŭt uĕh, uĕh lăng, băl mpôl dŭt tâm rnglăp, răm m'ak, nai ntĭm mât uănh ăp tơ̆ sa n'hanh mât uănh. tât kon hŏk mpôl hên."

Nai nti Lương Thị Hoa, nai ntĭm ngih săm ƀŭt ân gĭt, ngih săm ƀŭt nội trú ndŏ luh nau đă mhe đah rmôt nai ntĭm nti, mô knŭng tâm nau kan ntĭm nti ma n’ăp nau mât, răk chăm kon se nti, ngăn lah ăp kon se rơh bôk năp ngai ma rnăk vâl:  ‘Mât ndrel răk chăm ân kpn se nti tâm ăp năm deh êng êng, ngăn ngên lah kon se ntơm jrâu 1 tât jrâu 6, rnôk mhe nkhah ngai ma rnăk vâl hăn tât tâm ngih săm ƀŭt nội trú, âk kon se hôm geh nau mô gĭt ndrel nkah klâng ma rnăk vâl. Ndri ma, nŭih mât chăm mô knŭng ƀư nau kan răk kơl an kon se ân tâm di tâm ban, hôm geh kơl an, tâm dăch dơh lơn, mât chăm ndrel bonh đă kon se đŏng, ƀa ƀơ tât njrăng, uănh n’hâm soan, nau mĭn bah kon se đŏng”.

 Nau mât chăm nê hôm geh ntoh tâm ăp mông sa ăp nar bah ăp kon se. Yuh Đinh Thị Thoả, nŭih kơl gâm răk sa ân kon se tâm ngih săm ƀŭt mbơh, ntơm bah nau kan bah rnôk 4h30 ôi ndrel lôch tâm rnôk 7h măng. Ntơm nau nchrăp ndơ sa, rao, gâm, ân tât nau leo pă ndơ sa, rep kloh ngih ŭnh, ŭnh năk, nau kan nthoi nau kan tât lôch du nar ngăn: ‘Phung hên ntơm ƀư nau kan ntơm lơ 13/10. Rmôt ăp nŭih ƀư kan rnôk aơ dôl geh âk nau jêr đŏng, kŏ rnơm geh nau kơl an bah ăp nŭih nai ntĭm nti kon se đŏng. Phung hên kŏ nsôih dŭt n’hâm, gay ƀư jêh ueh nau kan bah nơm”.

 Gay ƀư ueh nau kan ntĭm nti bán trú, nội trú tâm rnôk ngih nti geh leo lăp dŏng ơm lơn ma nau nchrăp, ngih săm ƀŭt nchrăp ăp nau kan, tâm rgop nsum ma n’gâng kan tâm nkuăl ndrel rmôt kan tâm ntŭk.

Wa Võ Viết Khoa, Hiệu trường Ngih săm ƀŭt nội trú rep gưl Tiểu học ndrel Trung học cơ sở Ea Rốk, mbơh, rnôk ngih săm ƀŭt geh rmôt ndâk nkra jao ân, ngih săm bŭt ndal dăp rgum ăp nau dơi gay ƀư ăp nau kan. Lơ 13/10, ngih săm ƀŭt ƀư bán trú ân 515 kon se nti, năn kơl an me mbŏ kon se tâm rnôk ê dơi ƀư nội trú. Tât lơ 30/10, ngih săm ƀŭt ƀư dơi nội trú ân 337 kon se:  ‘Ngih săm ƀŭt kơl mbơh nchră nau ma Đảng uỷ, n’gâng kan tâm nkuăl geh nau ntrŭnh kơl an ân kon se lah rnoi mpôl đê̆ kŏ kơt lah geh nau rêh jêr jŏt tât ta aơ gay ma hăn nti. Phung hên tâm rgop rjăp ma me mbŏ kon se, ăp nŭih ntoh măt me mbŏ kon se gay ƀư nau kan tâm rgop rnôk ăp kon se geh hăn nti, mhâm ƀư pơk trong nơih ueh ngăn gay ăp kon se geh nau dơi răk êng săk nơm”.

Ndrel ma nau nsôih bah Ngih săm ƀŭt, n’gâng kan tâm nkuăl ƀa ƀơ mêt uănh, tâm rgop nsum gay doh rklaih nau jêr tâm rnôk ƀư nti bán trú, nội trú. Wa Trịnh Văn Cường, Groi Kruanh UBND xã Ea Rốc, mbơh, ntŭk ngih săm ƀŭt nội trú Ea Rôk geh nau nkra ngăch ngăn, tơm ntuh kơl hŏ “rlet mih, rlet nar” gay ma ƀư ân jêh knŭng tâm 6 khay, năn leo ngih săm ƀŭt dơi geh lăp ƀư kan ndrel jêh nkra tâm năm nti 2026-2027. Tât rnôk aơ, ăp ntŭk kan kŏ jêh ndrel leo lăp dŏng.

 Wa Trịnh Văn Cường lah rjăp, aơ lah ntŭk ueh khlay ngăn yor N’gâng kan neh dak ndâk nkra ân ƀon lan xã Ea Rôk. Ngih săm ƀŭt mô knŭng ntop tay ntŭk ntu ntĭm nti ueh ma hôm pơk trpong nơih gay nkuăl mât chăm ân ueh lơn ân kon se, ngăn kon se tâm rnăk ach o, kon se geh dơi kơl ndrel ăp kon se geh nau rêh jêr jŏt:  ‘Xã rđau đă ngăn lah Jrâu kan Văn hoá Xã hội ndrel Ban giám hiệu Ngih săm ƀŭt, ƀa ƀơ mêt uănh nau kan ntĭm nti bán trú, nội trú, ngăn lah nau kan mât răk kloh đăpmpăn ndơ ngêt sa, nchih lir kloh rvah ndơ sa tŏng kah lay ueh ân mông sa bah kon se. Đăp mpăn mhâ, ƀư mông sông sa ân tŏng kah ndrel ăp kon se ân geh nau nkoch mbơh mông sa bah nơm lah kah ngăn, đăp mpăn ueh ân săk jăn n’hâm soan gay đăp mpăn hăn ntĭm nti”.

Ntơm nau rhơn bah kon se ân tât nau gơih n’or bah nai ntĭm nti, nŭih ƀư nau răk chăm kon se ndrel nau kan bah n’gâng kan tâm nkuăl, ngih săm ƀŭt nội trú yor N’gâng kan neh dak ndaka pă ân xã nkuăl 3 Ea Rốk dôl jêng nau ueh ân kon se tâm nkuăl jêr, rnoh khlay bah ntŭk kan mô knŭng tâm drăp ndơ nâp ueh ma hôm nau nau dơi geh hăn nti, rƀŭn rgum gŭ âm ndrel hun hao ueh lơn, ngăn lah ăp nau kon se geh nau rêh jêr jŏt./.