Tĭng ƀư tay nău kơt nti n’hanh ƀư tĭng nuih n’hâm, trong gŭ rêh  Hồ Chí Minh tâm cán bộ, đảng viên, khay 3 năm 2023, Thị ủy Buôn Hồ, n’gor Dak Lak hŏ an ƀư bôk nău kan “Siƀŭt mpêt nkem Búa liềm vàng”, gay kơl ăp đảng viên geh nău rêh jêr jŏt ta ntŭk. Bah nê, njêng suan ntrôl rgop kơl nsan hao đăp mpăn nău rêh.  

Lah ngoăy tâm ăp đảng viên dơi geh siƀŭt mpêt nkrem, wa Trần Thanh Tâm, Chi bộ phường Bình Tân, Thị xã Buôn Hồ an gĭt: đah aƀaơ 6 năm păng geh tâm tom ndeh, 2 năm bôk năp gŭ wăm du ntŭk. Tât rnôk dơi dâk hăn păng nha hôm rbăn đŏng, ăp nău gŭ rêh nsing tâm ur, kon. Nău  rgŏ jă, ntop kơl bah drăp ndơ tât nuih n’hâm bah ăp băl tâm chi bộ n’hanh kônh wa ƀon lan lah suan ntrôl dŭt têh ur sai păng geh tay nău nsrôih rlău dơi kop ji, rlău dơi ăp nău jêr jŏt tâm nău rêh.

“Rnôk geh tâm tom ndeh tât aƀaơ hŏ dơi n’gâng kan ta ntŭk dŭt uănh khlay đŏng, way hăn tât ôp khâl n’hâm suan gay nsrôih rlău jêr jŏt kop ji, săk  djôr ranh, mô dơi ƀư du ntil  ndơ nơm geh tâm ur kon dơm”.

Tă geh tâm tom ndeh n’hanh  dơi geh dơn siƀŭt mpêt nkrem Búa liềm vàng, đảng viên Y Mơi Ktla, chi bộ buôn Dlung 1B, phường Thống Nhất, thị xã Buôn Hồ, an gĭt, rnăk păng mpeh săk ach o, dơn geh 4 sào neh mir dơm. Dơn siƀŭt mpêt nkrem ntop kơl 5 rkeh prăk, rnăk păng hŏ ntuh kơl mât chăm tơm tăm đah nău mpŏng mbra rgâl săk geh play, n’hao nău geh wăng sa an rnăk wâl.

“Lah uĕh mpeh Đảng ủy phường ntop kơl siƀŭt mpêt nkrem gay n’hao nsĭt geh an rnăk wâl. Siƀŭt mpêt nkrem nê geh tơm prăk gay rvăt phân poh mât chăm cà phê n’hanh rvăt ntil tơm tăm n’hanh rvăt dak si săm ji an săk nơm.”

Tâm ban kơt nê đŏng, đah siƀŭt mpêt nkrem dơi ntop kơl, đảng viên H’Môi Buôn Yă, chi bộ buôn DLung 1A, phường Thống Nhất hŏ rgum ntêm tay gay rvăt du mblâm ndrôk ntil sĭt mât:

“Mhe aơ nơh gâp dơn geh siƀŭt mpêt nkrem búa liềm vàng, bol mô âk yơn saơ nuih  n’hâm dŭt rhơn, kơl năp nthoi du gâl nău rêh nê nơh kơl nău jêr jŏt nău rêh gâp rnôk nê nơh”.

Bôk nău kan “siƀŭt mpêt nkrem Búa liềm vàng” dơi Thị ủy Buôn Hồ an ƀư ntơm bah khay 3 năm 2023. Tĭng nê, ăp cán bộ, đảng viên tâm lam thị xã tĭng ƀư mpêt nkrem ma âk trong ƀư kơt rngleh prăk khay, dơn ƀư ăp nău kan, njêng geh rnoh khlay wăng sa gay jêng tơm prăk mpêt nkrem. Nău ŭch lah ăp năm ăp đảng bộ tâm dâng mpêt nkrem dơi ngoăy tât bar “siƀŭt mpêt nkrem Búa liềm vàng”; ăp chi bộ tâm dâng mpêt nkrem dơi du  “siƀŭt mpêt nkrem Búa liềm vàng”. Lôch 6 khay rgŏ jă, thị xã hŏ rgum geh bơi 400 rkeh prăk, njêng 73 siƀŭt mpêt nkrem, rnoh khlay ăp siƀŭt mpêt nkrem lah 5 rkeh prăk, ndơ̆ kơl an ăp đảng viên geh nău rêh jêr jŏt ta ntŭk.

Wa Nguyễn Thị Thu Nguyệt, Bí thư Thị ủy Buôn Hồ an gĭt, trong leo ƀư “siƀŭt mpêt nkrem Búa liềm vàng” lah  nkô̆ mô mhe yơn trong ƀư geh ăp rgâl mhe hŏ nsĭt tay nău tam âk.  Aơ lah nău kan geh nkô̆  khlay, mpơl nău khlay kan, nău dơn kan na nê̆ bah tĭng cán bộ đảng viên n’hanh tĭng mpôl kan Đảng tâm nău kơt nti n’hanh ƀư tĭng nău Wa. Nău rdâk njêng pă an “siƀŭt mpêt nkrem Búa liềm vàng” hôm rgop rdâk njêng rmôt cán bộ ntĭt leo lor mpeh nuih n’hâm uĕh lŏng, trong gŭ rêh, krêp dêh đah mpôl kan đảng:

He mbra dơi lah bôk năp tơm ndơ dja mô hŏ âk yơn păng njêng luh dơi nău ring tam, jru hvi  tâm  lam rêng kan Đảng tâm lam thị xã n’hanh lơn lah njêng dơi nău ring uănh khlay têh tât bah cán bộ đảng viên ta tĭng ntŭk. Nău dŭt khlay lơn lah, ngoăy tâm ăp nkô̆ hôr chính trị geh nău khlay đảng ta aơ nê lah ma nău ndơ̆ kơl an siƀŭt mpêt nkrem búa liềm vàng dja gay nkrêp nău dơn kan gĭt êng bah đảng viên đah nău râng sinh hoạt mpôl kan đảng tâm dâng ta ntŭk hê, lơn lah chi bộ tâm dâng ta ntŭk gay n’hao săk tam sinh hoạt chi bộ aƀaơ.”

Bôk nău kan “siƀŭt mpêt nkrem Búa liềm vàng” dôl nsĭt tay nău dơi tam ngăn ngăn, mpơl nuih n’hâm rŏng nuĭh jru hvi, dơi đảng viên n’hanh nuĭh ƀon lan ta Thị xã Buôn Hồ ,Dak Lak, rnê âk, njêng suan ring tam tâm nău rêh jêng kon nuĭh./.