Aơ lah njoat hăn khlăy, mât đăp mpăn nar ƀon lan ƀư tơm geh ƀư di luật, đăp mpăn, lah na nê̆ nău ƀư tơm n’hanh nău ntoh kan bâh ngih dak ta nkual dak lêng huêng khlăy bâh neh dak. Tĭng nău mbơh tơih bâh n’gâng kan đặc khu Trường Sa,  ta lam ntŭk geh 21 nkual nklăch phiếu.tât aƀaơ, nău kan nchrăp geh ƀư tâm ban, di nău ntrŭnh, di luật. Ndơ dŏng ntŭk kan geh nchrăp tŏng ăp, geh 22 thung phiếu tơm, 16 thung phiêú ba kơi ndrel đah lĕ rngôch drăp ndơ săm ƀŭt, rnoh săk cử tri, phiếu săch. Nău kan tâm ton tâm nchră, nchih săk cử tri n’hanh nuĭh leo bôk năp geh ƀư na nê̆, kloh rjăp. Nău kan mbơh tơih geh ntrôl dăng, kơl an cán bộ, tahen n’hanh ƀon lan gĭt na nê̆ nău khlăy chính trị  tơm khlăy ngăn bâh rơh săch kruanh. Lôch rơh rƀŭn nchră, nuĭh leo kan đặc khu Trường Sa lĕ tâm nchră pă thung phiêu, thẻ cử tri, drăp ndơ săch kơl an ăp mpôl ƀư nău kan. Bar duk bâh nkual 4 hải quân lĕ sĭt bâh quân cảng Cam Ranh, n’gor Khánh Hoà, ndơ̆ ăp mpôl kan ndrel đah thung phiếu hăn ta ăp ntŭk gôl dak ta đặc khu Trường Sa.