Ăp khay bôk năm, nău kan tăch n’gluh bah ăp doanh nghiệp tuch tăm ta Dak Lak hŏ khuh n’gôr, ton nsĭt tay ăp nău dơi uĕh lăng. Ntoh lư kơt Công ty Cổ phần Banana Brothers Farm, nkuâl M’Đrắc, n’gor Dak Lak mhe tăch n’gluh 100 tấn prit tât Trung Quốc n’hanh Hàn Quốc; Công ty TNHH Ban Mê Green Farm hŏ ký siƀŭt nkah n’hanh tâm ton tăch n’gluh rlău 100 container sầu riêng đah băl tâm boh.

Âk doanh nghiệp bah Dak Lak hŏ lor nchrăp rgâl mhe, ntêr lĕ rêng ƀư gay n’hao săk geh, kah uĕh ndơ, tŏng an nău ŭch  geh nar lơn ma âk ntŭk tăch dak bah dih. Sở Nông nghiệp n’hanh Phát triển Nông thôn, n’gor Dak Lak, an gĭt: năm 2025, n’gor rgum n’hao tay săk kah ndơ geh ƀư tuch tăm, tŏng an rnoh uĕh di tăch n’gluh. Du nău mpơl rhơn êng ƀa ƀă tâm nău tăch n’gluh ndơ tuch tăm ta Dak Lak đŏng nê lah ndơ cà phê săk kah, cà phê kah khlay dơi ăp dak bah dih mât uănh khlay tay. Bah meng cà phê tăch n’gluh mblâm, ăp cà phê nkret njêng jru bah n’gor mbrơi năl dơi ntŭk gŭ kan rnôk geh măt ta âk dak, nkual neh đŏng. Tâm nê geh ăp ntŭk tăch khăch khoch yơn săk geh âk kơt: Mỹ, Nhật Bản, Hàn Quốc, châu Âu.