Ôi 4/3, Bộ Quốc phòng ƀư n’glăp rgum lor bôk năp ăp mpôl râng n’grĭng tahen, ntroh hăn tâm Nar nkah ndray 50 năm Nar rklaih luh miền Nam, dơn ngoăy neh dak (30/04/1975 – 30/04/2025) tĭng trong ƀư pơk dŏng dăng dơi ƀoh đah 4 rkŭm bah  ăp quân khu tâm lam dak. Ta bôk ƀoh rkŭm 1- Ntŭk rgum tiăr nti gưl neh dak 4, Mỹ Đức, Hà Nội, Đại tướng Nguyễn Tân Cương, Tổng Tham mưu trưởng Tahen ƀon lan Việt Nam, Thứ trưởng Bộ Quốc phòng tât râng.

Ta bôk ƀoh rkŭm 1 đah rlău 1.500 tahen, sỹ quan, dân quân, tự vệ tâm ăp mpôl cờ đảng – cờ tổ quốc, mpôl bu ur quân nhạc, mpôl sỹ quan lục quân, mpôl sỹ quan hải quân, mpôl sỹ quan phòng không không quân, mpôl  sỹ quan cảnh sát dak lêng, mpôl bu ur sỹ quan thông tin, mpôl bu ur sỹ quan quân y, mpôl bu ur mât njrăng đăp mpăn Việt Nam, mpôl tahen lục quân, mpôl tahen tăng thiết giáp, mpôl tahen đặc công, mpôl bu ur dân quân miền Bắc, mpôl hồng kỳ n’hanh mpôl dâk mprĭp. Ôp uănh ta rơh n’glăp rgum Đại tướng Nguyễn Tân Cương rnê âk nuih n’hâm tiăr nti bah cán bộ tahen, yơn lah Tổng tham mưu trưởng nchŏng luh du đêt ntil ân nkra bah đŏng. Rmôt n’grĭng hăn tahen, ntroh hăn tâm nar nkah ndray gay mpơl tay nuih n’hâm han dăng bah rơh rdôl lơh lam lĕ rngôch n’hanh dâk lơh khay năm mhe 1975, ma chông yôch lah trong nchrăp Hồ Chí Minh hŏ lơh dơi lam lĕ rngôch tâm nŭng nar 30/4/1975.