N’gor Kon Tum n’hanh n’gor Attapư geh nsum trong n’har bri jong rlău 75km đah rnoh neh bri dăch n’har  hvi klâp ma 39 rbăn ha. Bri ta nkual aơ jêr hăn nsong, ngai đah nkual ƀon lan gŭ, tâm bri geh âk ntil mpô mpa bri, tơm si khlay jêng mbra geh âk nuĭh tât sŏk ƀư jêr tâm nău kan mât uănh bri.

Lvang năm 2024-2025, ntŭk kan tuch tăm mât rong n’hanh hun hao ƀon lan n’gor Kon Tum n’hanh ntŭk kan Nông Lâm n’gor Attapư dơn ngoăy an geh n’haob tay nău tâm rgop kan, tâm mbơh nău mhe, nău gĭt vât, tă blău kan gay ma mât njrăng, njrăng ăp nău ƀư tih tâm trong kan  mât bri, tâm kơl mpeh njrăng rdâng ŭnh sa bri ta rgŏ trong n’har bri ta 2 n’gor. Dơi gĭt bâh năm 2016, ntŭk kan tuch tăm mât rong n’hanh hun hao ƀon lan n’gor Kon Tum n’hanh ntŭk kan Nông lâm n’gor Attapư lĕ geh tâm kơl mpeh mât bri ta nkual n’har bri ngih dak ntŭk hăn let 2 n’gor. Kanŭng êng lvang năm 2019-2023, mpôl kan mât uanh bri ta Kon Tum lĕ geh ƀư bơi tât 600 tơ̆ uănh nđôi, geh saơ 35 rơh ƀư tih Luật mât uănh bri. Mpôl kan têh n’gor Attapư lĕ geh ƀư 79 rơh uănh nđôi, joi, sŏk kân rlău 48 met khối si, du đê̆ ntil ndơ n’hanh âk ntil ndơ si đar êng.