Ăp nar aơ, ta ăp n’glah trong ta xă Đăk Ngọk, nkuăl Đăk Hà, n’gor Kon Tum ntơr ang nkao. Bah năp rnôk wơt Tết Nguyên đán Ất Tỵ 2025, Đảng bộ xă Đăk Ngọk lĕ ƀư lôch uĕh Đại hội đại biểu rơh tal 3, năm kan 2025-2030. Aơ lah nău chính trị khlay mô knŭng bah 239 đảng viên ma hôm lah nău nsing nơm, nău mpŏng ŭch bah bơi 5.000 nuĭh ƀon lan tâm xă. Wa Lê Văn Y, thôn Đăk Tin, nkoch:

Năm 2013 nar bôk năp ndâk njêng xă Đăk Ngọk kônh wa dŭt âk jêr jŏt, trong hăn ri bŏk rsĭk khuch dŭt âk tât nău rêh, nkra njêng bah kônh wa ƀon lan. Tâm rnôk 10 năm ndâk njêng n’hanh hun hao đah du rmôt kruanh tâm ban ŭch, tâm rnglăp xă Đăk Ngọk aƀaơ lĕ hun hao dŭt âk. Aƀaơ xă lĕ jêh 19/19 rnoh ndơ ƀư thôn ƀon mhe n’hanh nău rêh bah kônh wa aƀaơ dŭt rhơn.

Tâm năm mhe rlău, 12 chi bộ đah 239 đảng viên bah xă Đăk Ngọk lah chông cờ hăn lor mro tâm hun hao wăng sa-rêh jêng n’hao nău rêh nuĭh ƀon lan. Tât aƀaơ 4/7 thôn bah xă dơi kơp dơn thôn ƀon mhe rup gui lor, 2 thôn dơi kơp dơn thôn ƀon mhe nkual rnoi mpôl đêt. Lam xă aƀaơ knŭng hôm 8 rnăk ach o. Wa A Xen, nuĭh Xơ Đăng, ta ƀon Đăk Kđem, an gĭt:

Bah năp đaơ ri ƀon jêr jŏt ngăn, bah 2 năm aơ ri ƀon lan rgâl hao rgâl ntil tơm tăm, mpa rong. Kônh wa nkra njêng dŭt âk ba lŏ n’hanh tăm cà phê. Knơm nău uănh tât bah Đảng, n’gâng kan ƀon lan tât ƀon lan bah nĕ ƀon lan nar aơ lĕ hao.

Năm kan mhe rlău, tâm 26 rnoh an ƀư xă Đăk Ngọk lôch jêh geh âk rnoh ndơ ƀư khlay geh săk rnglăy ntoh lư, kơt: rĭng geh bôk nuĭh rlău 70 rkeh prăk, ndâk njêng xă geh tâm di thôn ƀon mhe n’hao prêh; rnoh rnăk ach o hŭch ngăch. Wa Phan Tiến Dũng, Bí thư Chi bộ nkre ƀư Kruanh Ban pah kan măt trận thôn Đăk Bình, nkoch nău blău ơm ndâk njêng thôn ƀon mhe rup gui leo lor.

Chi bộ ntĭm rđău đah nghị quyết ăp khay. Nkoch trêng kônh wa ƀư tĭng tŏng ăp rnoh ndơ ƀư. 19 rnoh ndơ ƀư aƀaơ lĕ geh n’hanh mpôl hên lĕ jêng du thôn ƀon mhe rup gui lor lor bôk năm 2025 dơi UBND nkuăl kơp dơn. Bah du thôn way ƀư đah lŏ mir bôk năm kan mhe 55 rkeh prăk du hê tât dŭt năm kan bơi 80 rkleh prăk du hê. Đah nău nsrôih bah lĕ trong chính trị ndơ̆ tay hơm răm uĕh lăng an nuĭh ƀon lan.

Rgâl nău mĭn tâm pah kan jan sa bah nuĭh ƀon lan lĕ geh soan rêh mhe hun hao wăng sa nsum lĕ rgop n’hao nău geh pah kan jan sa, rnoh khlay rlău 450 ha ba, rlău 1.600 ha cà phê ndrel hang rhiăng ha tơm sa play n’hanh tơm dak si. Đah dŭt n’hâm rgâl mhe hun hao wăng sa rêh jêng nâp nâl, Đại hội đại biểu Đảng bộ xă Đăk Ngọk năm kan 2025-2030 mĭn lah, ndâk njêng nău rêh jêng geh tâm di thôn ƀon mhe rup gui leo lor, rĭng geh bôk nuĭh geh rlău 78 rkeh prăk du năm.... Wa Y Sương, Groi Bí thư Đảng ủy, Kruanh UBND xă Đăk Ngọk, an gĭt:

Đảng bộ ntĭm rđău ăp nău kan, nsum mpôl đah ăp bôk nău kan, trong nchrăp na nê̆ gay ƀư tĭng ăp năm n’hanh tĭng lvang. Rgŏ jă nău lăp bah nsum mpôl nuĭh ƀon lan ta ntŭk tâm nău ndâk njêng thôn ƀon mhe. Ndrel đah nĕ n’hao dơi hăn lor bah nuĭh dâk bôk n’hanh lĕ đah nău kan bah nuĭh tâm ôp tâm nchră ƀư tĭng ăp nkô̆ nău pah kan. Rgum tâm ăp nău kan, trong mkra gay hun hao wăng sa-rêh jêng, rnă njrăng nău rêh, đah nuĭh rnoi mpôl đêt chroh rƀŭn an tâm ban n’hanh đăp mpăn.

Nău rgâl săk têh dăng bah xă Đăk Ngọk, nkuăl Đăk Hà, n’gor Kon Tum tâm ăp năm bah năp lah an saơ na nê̆ mpeh nău rđău di bah rmôt kan Đảng n’hanh nuih n’hâm ƀon lan tâm rnglăp. Ntop ndơp nău dơi, Đăk Ngọk nsing nơm wơt rhơn năm mhe 2025 nâp jâng hăn tât nău rƀŏng ndâk njêng ƀon tơm ndrŏng uĕh, rup gui leo lor.