Ta buôn Ma Giai, xã Đất Bằng, nkuâl Krông Pa, n’gor Gia Lai, săk moh mô dơn lah ntŭk an bu gĭt tât ma hôm geh nkô̆ hôr khlay nkah gĭt đah wa Kpă Y Thia (way kuăl lah Ama Giai) – nuĭh pah neh, njêng ƀon. Bơi n’gul rach năm rlău, rnăk păng hŏ jêng ntĭt leo lor trong chrat an an ăp đảng viên n’hanh nuĭh ƀon lan, rgop rdâk njêng ƀon tơm neh dak.

Buôn Ma Giai, xã Đất Bằng, nkuâl Krông Pa mpơl luh đah muh măt uĕh nse, ăp gung trong srăch uĕh. Nuĭh ƀon lan ta aơ n’hao êng săk mpeh Ama Giai, du đảng viên sŏng di, nuĭh hŏ ntơm njêng an ƀon lan. Nê lah wa Kpă Y Thia, deh năm 1933, rnoi Chăm H’roi, hŏ rgŏ jă kônh wa gŭ rêh đăp mpăn ntơm bah ăp nar bôk năp rklaih luh, ƀư ntŭk dja ntơm bah 6 rnăk bôk năp jêng ƀon lan âk mpưm bah nkuâl Krông Pa. Ăp nău rgop bah păng hŏ dơi nchih nkah, săk way ôp ăp nar bah păng dơi ntơ jêng buôn Ma Giai n’hanh ăp ntŭk moh kơt leng Ma Giai, dak bât ler Ma Giai, dak me Ma Giai.

 Ama Giai hŏ “sui găr ntil” nuih n’hâm cách mạng tâm rnăk n’hanh ƀon lan. êng rnăk păng hŏ geh 7 nuĭh lah đảng viên. Wa Bă Văn Hơm, 75 năm deh, klay dŭt bah Ama Giai, lah Bí thư chi bộ lor bôk năp bah buôn Ma Giai năm 2006, nkoch tay.

“Ntơm bah nar ƀư hồ sơ lý lịch đảng viên he hŏ ntrŏng năl nău mĭn. Năm 1975 bah tâm lơh tâm su rnăk gŭ nklang yôk, ta ntŭk gŭ nde, gâp sĭt rgŏ jă rnăk wâl me bơ̆ jŭr gŭ ta aơ. Gâp mô mĭn mpeh prăk kaih, djăt tĭng Đảng tât tăch n’hâm n’glĕ dŭt, bôk rngok hôm kah hôm tĭng Đảng, mhâm nău he ton ri he mât kơt nê.”

Chi bộ buôn Ma Giai ntơm bah 9 đảng viên bôk năp hŏ hao âk tât 26 đảng viên aƀaơ. Wa La O Khởi, klay bôk năp bah wa Ama Giai, lah rnăk wăng sa geh mbơm oi ta buôn. Rnăk wa Khởi ŭch gay an ngih dak sŏk mplơ̆ 2,2 ha neh rong an ƀư ntŭk ntrơn du mhe, leo lor yor ma nău geh nsum, kơl 62 rnăk ƀon lan đăp mpăn nău rêh. Wa La O Khởi an gĭt:

“Nuih n’hâm du hê nuĭh đảng viên he ân leo lor, hăn bôk năp ntơm bah rnăk wâl tât ƀon lan, nsum mpôl. He saơ khân păng moh ndơ mô geh ri he ntop kơl ndơ nê đŏng, ntop kơl khân păng, mô geh ndơ he kơl khân păng nău mbơh nău ngơi bah he gay ntĭm nti an bu kơt tĭng, mhâm trong wăng sa gay hun hao rnăk wâl. Tâm rnăk wâl ri mhâm ƀư an mô geh tâm lah tâm janh rnăk wâl, mô tih pháp luật”

Nău rgâl bah buôn Ma Giai nar aơ geh ăp nău rgop, nău nsrôih bah rơh kơn đảng viên rnăk Ama Giai. Khân păng jêng nuĭh ntĭt leo lor trong mpeh nuih n’hâm rŏng dak, trong di cách mạng an rơh đảng viên mom ta ntŭk kơt nti ƀư tĭng. Đảng viên La O Thị Hoa, nkoch:

“Lah druh mom, săk gâp nơm way nsrôih gay tâm di đah mpôl bah Đảng. Tâm nău rêh way tĭng jăp gung trong, trong kơl pháp luật bah Ngih dak. Rơh kơn mpôl hên nsing nơm ngăn tâm gung trong sol ang bah Đảng, n’hanh gung trong u che he hŏ sơch”

Nô La O Á- Bí thư Chi bộ nkre ƀư kruanh buôn Ma Giai xã Đất Bằng, an gĭt: Buôn Ma Giai aƀaơ geh 184 rnăk đah 752 nuĭh, lĕ rngôch lah nuĭh Chăm H’roi. Ama Giai lah nuĭh ntơm njêng an nău hun hao ta buôn dŭt ngai bah xã Đất Bằng.

“Trong leo tĭng wa Kpă Thia lah du nău rhơn n’hao đah chi bộ gay ăp đảng viên jêh aơ tay kơt nti, nsrôih, mhâm ƀư gay rêh nău mĭn rgum tâm trong uĕh dibah Đảng, kon său jêh aơ tay kơt tĭng . Đah wa Kpă Thia he saơ nê gay ƀư nuih n’hâm nđơr gay nsrôih mhâm ƀư jêh aơ tay mbra ƀư dơi kơt păng, du hê nuĭh têh jêng bah cách mạng tât aƀaơ an rơh kon său bah kơi tay kơt tĭng”

Nkoch mpeh wa Kpă Y Thia, wa Cao Thị Viễn Phương, Bí thư Đảng ủy xã Đất Bằng, nkuâl Krông Pa an gĭt, aơ lah nuĭh geh ăp n’hâm suan rgop khlay an nău hun hao wăng sa rêh jêng kon nuĭh bah buôn Ma Giai lah êng n’hanh xã Đất Bằng lah nsum tâm rơh rgâl mhe.

“Rnăk đảng viên Kpă Y Thia lah ngoăy tâm ăp rnăk ơm geh âk nuih n’hâm cách mạng, êng păng nơm mhe dơi ntăm an huy hiệu 60 năm Đảng. Ăp nuĭh tâm rnăk lah ăp nuĭh dŭt ntĭt leo lor n’hanh nsrôih tâm ăp nău kan ta thôn buôn, ta ntŭk. Bol năm ranh suan djôr yơn wa Kpă Y Thia way dâk leo lor bôk năp râng ăp rơh rgŏ jă tâm hun hao wăng sa, jut jăng ji ngot n’hŭch ach o n’hanh nsrôih tâm ăp nău kan lam rêh jêng kon nuĭh”

Khay năm mhe dja nkah ndray 95 năm rdâk njêng n’hanh têh jêng bah Đảng. Ăp nuĭh dâk leo lor kơt rnăk wa Kpă Y Thia lah tơm nuĭh khlay gay rdâk njêng Đảng tâm ƀon lan, lah ntung njŏ gay ƀon lan joi tât Đảng, ndrel nsum suan du nuih n’hâm rdâk njêng nkual neh ngai ngât bah n’gor Gia Lai  nar lơn ma hun hao./.