Nô Rơ Châm Dun, 30 năm deh, nuĭh Jarai, gŭ ta ƀon Ngol Rông, xã Ia Krêl, nkuăl Đức Cơ geh công ty 74, Binh đoàn 15 săch lăp pah kan kor rtăk cao su bâh bôk năm aơ. Nô an gĭt, đah rnoh prăk khay 7 rkeh prăk 1 khay, nô lĕ geh nău rêh đăp mpăn lơn.

 “ Ê lor lăp pah kan ta aơ rĭ rnăk vâl gâp dŭt jêr jŏt ngăn, aƀaơ geh ngih jay gŭ, geh nău kan hôm rĭ hên ŭch geh nău đăp mpăn, ba kơi tay kon său geh hăn nti, gâp lah ueh công ty lĕ kơl gâp”.

Đah Nô Ksor Y Đô gŭ kan ta xã Ia Krêl, nkuăl Đức Cơ, geh nău kơl kan bâh ăp cán bộ tâm Công ty 75, Binh đoàn 15, tât aƀaơ nô lĕ jăp ti kan n’hanh geh pă mât tơm cao su gay ma kor rtăk.

 “ lăp pah kan kor rtăk rĭ geh n’hao nău blău kan, geh gĭt âk nău myhe. Ntơm nơh mô hŏ gĭt kor rtăk, lăp công ty geh nuĭh nti ƀư an nău kan rĭ gâp lĕ blău âk nău kan. Bâh nău ntĭm nti gâp lĕ knơm ta nău kan nơm, mbra lăp pah kan gay ma joi prăk geh prăk dŏng an rnăk vâl nơm”.

Ăp năm ba năp, Công ty 74, công ty 75, bâh binh đoàn 15, pah kan ta nkuăl n’har bri Đức Cơ, n’gor Gia Lai lĕ geh ntĭm nti bơi tât 2 rbăn nuĭh kor rtăk cao su lah nuĭh rnoi đê̆ ta ntŭk. Ăp ntŭk kan hôm geh ƀư săk rnglăy nău kan rgŏ jă ƀon lan, mât đăp mpăn nău rêh jêng, pă ndrôk me an ƀon lan mât. N’hao joat jâng oh tât ngih nti an oh kon se ach o, nkra mhe, n’hao ueh trong hăn, ƀư ngih jay tâm pêt tâm rŏng, ngih tâm rnglăp, ƀư rơh tết đah ƀon lan, pă ndơ an rnăk dơi kơl...đah lĕ rnoh prăk rlău bar pe jât rmen.

Êng mpeh nău pă nău kan an nuĭh ƀon lan ta ntŭk, Đại tá Trịnh Hà Tâm- Giám đốc công ty 75- Binh đoàn 15 an gĭt.

 “Công ty 75 năm aơ lĕ geh săch tŏng nuĭh kan, lĕ rngôch lah nuĭh pah kan ta ntŭk. Rnôk ntĭm nti kơl an rĭ gâp lĕ kơl an lĕ rngôch mpeh ntil ndơ bâh pêh kor gay ma nti n’hanh ntĭm nti an khân păng ƀư yor nău kan an geh ƀư bâh kĩ thuật dŭt âk n’hanh ueh, na nê̆, yor nĕ mpôl kan kơl an nai nti n’hanh cán bộ way geh nhup ti nti kan ndrel đah 3 nuĭh pah kan êng”.

Uănh năl mpeh nău kan bâh Binh đoàn 15 tâm nău ƀư tĭng pah kan mpôl rnoi ta ntŭk, wa Trần Ngọc Phận, groi kruanh UBND nkuăl Đức Cơ ngơi.

“ Ntŭk kan bâh Binh đoàn 15 rĭ ăp công ty lĕ kơl an ta ntŭk dŭt âk ngăn tâm nău ntuh kơl ndơ dŏng, trok prăk an nuĭh kan, dŭt âk lah ƀon lan rnoi đê̆. Ngăn lah nău rnă njrăng đăp mpăn, tâm rgop đah ăp ntŭk tâm nău kan rdâk njêng nkual ƀon lan mhe rĭ ăp công ty ƀư dŭt ueh. Ăp nău mbra dơi geh công ty mbra kơl an ta ntŭk dŭt ngăch n’hanh tâm di, pă nău kan , nta nău geh an ƀon lan ta ntŭk đăp mpăn nău rêh jêng”.

Đại tá Khuất Bá Cao, Bí thư Đảng ủy, Phó Tư lệnh Binh đoàn 15,an gĭt, an lor săch lăp nuĭh kan lah nuĭh rnoi đê̆ ta ntŭk lăp kan lah du nău ntrŭnh khlăy bâh Đảng ủy, Bộ tư lệnh Binh đoàn 15, ntop hun hao wăng sa, n’hao nău rêh an ƀon lan, mât đăp mpăn rnă njrăng chính trị, đăp mpăn nău rêh jêng ta n’har bri.

“ Bơi tât 8 rbăn ƀon lan rnoi đê̆ bâh Binh đoàn geh hên mât kơl. Mpôl hên lĕ ntĭm ăp ntŭk kan bâh binh đoàn mât uănh, n’hao nău dơi kan tâm ban kơt an lor gay ma ntrôl dăng dŏng nuĭh ƀon lan rnoi đê̆ lăp pah kan ta ăp ntŭk kan gay ma mât đăp mpăn mpeh nău geh, nău rêh an ƀon lan đah âk rnoh nău kan, trong kan gay ma kơl an ƀon lan mpeh ndơ dŏng n’hanh nău kan, ndơ kan, kĩ thuật, ntil, prăk kan. Nsrôih mbơh tơih rgŏ jă ƀon lan pah kan jan sa geh kĩ thuật blău nău kan”.