Ăp nar dja, oh Vũ Trần Tiến Đạt, kon se nti jrô 5 Nhih nti Tiểu học Nguyễn Thị Định, xã Ia R’vê, ndrel băl chưng play ta jâng gung bah năp mpêr nhih nti. Mpeh tâm rle, Nhih nti Nội trú rep gưl xã Ia R’vê dôl mbrơi ƀư lôch jêh ndơ rhăch rhên n’glĕ dŭt bah nhih nti nội trú, jay tâm rlong, thư viện... Đạt dŭt nđơr năm nti 2026–2027 tât, oh ndrel ăp băl dơi kơt nti, gŭ rêh tâm nhih nti mhe:

“Nai ntĭm n’hanh me bơ̆ gâp lah ntơm bah năm nti tât gâp mbra lăp nti Tâm nhih nti nội trú rep gưl xã Ia R’vê. Oh saơ dŭt rhơn lah dơi lăp tâm nê nti. Ta nê, ăp nai ntĭm mbra mât chăm mpôl hên, ntơm bah bĭch sa, rlu rlău n’hanh geh lĕ ma tập thể dục, thể thao. Kêng dŭt pơh gâp mơ sĭt jay. Gâp ton mbra dơi kơt nti jăp. Gâp ŭch jêng du cầu thủ chưng play.”

Hôm oh Nông Thị Thùy, kon se nti jrô 7 nhih nti THCS Trần Hưng Đạo, xã Ia Lốp an gĭt, Nhih nti nội trú rep gưl xã Ia Lốp dơi rdâk njêng nsing bah Nhih nti Tiểu học Nguyễn Trãi n’hanh Nhih nti THCS Trần Hưng Đạo ơm. Yor kơt nê̆, năm nti tât mbra kơt nti, gŭ rêh nội trú ta aơ. Bah năp nău dơi nti tâm nhih nti mhe têh uĕh, ăp tŏng, đah nkual nội trú srăch se, oh mpơl nău:

“Gâp dŭt rhơn yor dơi lăp nti nội trú yor jay gâp ngay nhih nti tât 15 cây số. Tâm nhih nti geh băl mpôl, nai ntĭm, geh nkual nội trú bu ur têh uĕh. Gâp mbra nti gŭ rêh êng, nti êng. Gâp ŭch rŏng jêng nai ntĭm. Gâp mbra nsrôih kơt nti dŭt uĕh gay dơi tât ngăn nău ŭch rŏng nê, jêh aơ tay plơ̆ tay n’har bri ntĭm nău gĭt blău an ăp kon se jê̆ ta aơ.”

N’gor Dak Lak geh 4 xã n’har bri lah Ea Bung, Ia R’vê, Ia Lốp n’hanh Buôn Đôn. Ăp xã geh neh hvi, ƀon lan gŭ srang ngai, âk thôn, ƀon ngai nklang xã bar pe jât ki-lô-mét. Yuh Vi Thị Thiều, ta thôn ƀon druh ndăm njêng nău kan, xã Ia Lốp an gĭt: Rnăk geh bar hê kon dôl nti jrô 8 n’hanh jrô 6. Jay ngai đah nhih nti bơi 20 km jêng nău njŭn wơt ăp kon se hăn nti jâk r’ah. Nău ăp kon se dơi nti nội trú gŭ tay ta nhih nti kơl rnăk wâl đăp mpăn lơn.

“Rnôk ăp oh kon dơi kơt nti, gŭ rêh tâm nhih nti uĕh reh, ăp tŏng drăp ndơ đah ntŭk gŭ ntŭk sa ri gâp mô hôm rvê. Aơ mbra lah ntŭk kơl ăp oh kon hun hao lam lĕ rngôch bah nău gĭt blău tât săk jăn. Lah me bơ̆ ri gâp dŭt rhơn yor mô kâp rvê wơt kơn ăp nar kơt ntơm nơh, n’hanh mô hôm kâp rvê njrăng uănh ăp oh kon đŏng ôh. Kêng dŭt pơh kon păng mbra sĭt, khâl jay.”

Lvang năm 2025–2027, n’gor Dak Lak rdâk njêng 4 nhih nti nội trú rep gưl ta ăp xã n’har bri n’hanh nkual jêr jŏt. Tâm nê, ăp nhih nti ta Ia R’vê, Ia Lốp n’hanh Buôn Đôn mbra n’glăp dŏng tâm năm nti 2026–2027, wơt nklăp 3.100 kon se nti bah jrô 1 tât jrô 9, đah nklăp 2/3 kon se nti gŭ tay ta nội trú.

Wa Hồ Sĩ Cát, Hiệu trưởng Nhih nti Nội trú rep gưl Ia R’vê (xã Ia R’vê), an gĭt nhih nti hŏ ƀư lôch jêh sơch lăp nti 910 kon se nti bah 3 nhih nti lah: Tiểu học, THCS Chu Văn An, THCS Nguyễn Thị Định n’hanh Tiểu học Nguyễn Đình Chiểu. Nkre, nhih nti dôl dăp rgum ăp tŏng rmôt nai ntĭm, nuĭh kan văn phòng, nuĭh mât njrăng kon se nti n’hanh jay ngêt sa, nchrăp wơt kon se nti tâm năm nti mhe 2026 – 2027.

“Rnôk ăp kon se lăp nti hôm ri nkô̆ nău mât uănh kon se nti bah ơm ôi tât măng mô hôm rvê đŏng ôh, nuih n’hâm đăp mpăn hăn luh mir. Me bơ̆ mô hôm rvê nar, măng njŭn wơt, n’gon trău an kon sa đŏng ôh. Lĕ rngôch kon se nti ta nhih nti nội trú dơi geh ăp trong kơl dơm bah prăk sa, kho ao, siƀŭt sitra, bảo hiểm y tế tă bah Nhih nti ntop kơl.”

 Ăp nhih nti ntŭk n’har bri têh hvi Tây Nguyên mô dơn pơk luh trong nti ren uĕh lơn ma hôm chăt nar mpŏng wơl geh kơl kon se nkual n’har bri hun hao lam lĕ rngôch, gay ôi tay klak plơ̆ sĭt rgop suan rdâk njêng ƀon tơm ntŭk mpêr n’har neh dak.