Biên tập viên Y Jek Niê Kđăm (Nay Jet)-Kruanh rmôt ntoh nau ngơi rnoi Jrai, lah ngoai tâm nŭih biên tập viên jŏ năm bah Bôk nau ntuh nkah ngăn rnôk geh săch lăp pah kan rnôk păng mhe lôch nti jrâu 12 bah Ngih săm ƀŭt Phổ thông Dân tộc Nội trú N’Trang Lơng, n’gor Dak Lak.

 Nê lah nau dơi bah nau săch dŭt rjăp yor ăp nhà báo ơm bah Radio Việt Nam ƀư đah âk jêt kon se nti rnoi Jrai. Jêh lôch rlong rơh bôk năp tâm ngih săm ƀŭt, ăp kon se geh ndeh 12 ntŭk ncho bah Sở Văn hoá thông tin n’gor Dak Lak leo tât ntŭk pah kan rlong ăp nau: Nchih nau nkoch tât nŭih ueh kan ueh đah nau ngơi Yuăn, jêh nê rblang ndrel răk nau Jrai tâm Ntŭk kan ntoh rup bah Dak Lak. Tât lơ 1/7/1994 kon se nti Nay Jek ndơn săm ƀŭt geh lăp tâm Radio Việt Nam, jêng nŭih pah kan mom ngăn rnôk nê. Jêh nê, nô geh rđau kan njoăl tât n’gor Gia Lai (ngai nklăp 200km) đă nau Siu Pơi- Giám đốc N’gâng kan ntĭm nti n’gor Gia Lai ntĭm nti ndrel răk:

 ‘Gâp rhơn ngăn rnôk geh Radio Việt Nam ndơn lăp tât pah kan tâm ntŭk kan aơ. Săk gâp nơm ŭch ngăn tâm rnôk tâm nchră nau ngơi, drâu nai nti ơm Siu Pơi kŏ geh nau ntĭnh: Moh nau ma U, che, kônh wa, oh nô hăn lor ƀư e dơi tâm rnôk nti nau nchih, nau ngơi bah rnoi Jrai ri mon, ăp oh rơh ba kơi lŏ ƀư ân jêh nau nchih, nau răk nau ngơi Jrai ân mhâm ƀư ân tâm di ndrel geh nau ueh rlau đŏng. Tât rnôk aơ, jêh bơi tât 30 năm pah kan tâm Radio Việt Nam, săk gâp nơm hŏ geh kơt nti ndrel rgum âk đŏng nau blau tâm nau rêh, nau nkah tâm nau pah kan bah gâp. Ngăn lah, tâm nau ntoh ngơi rnoi Jrai tâm Radio Việt Nam lah nau săch rjăp ngăn ndrel geh nau ƀư ueh ngăn tâm gưl kan neh dak gay ma mât ndrel mbơh nau ngơi, nau nchih rnoi Jrai ân rơh ba kơi”.

Bơi tât 30 năm pah kan, geh âk nau nkah, yơn Biên tập viên Nay Jek saơ du nau kan geh nau khlay nê lah kơl an bu ranh Rơ Chăm Yơn rhôp geh 200 nau mprơ rnoi Jrai. Nau kan khlay geh tâm rnôk dôl âk nau jêr. Ntŭk kan ê geh ntŭk rhôp nau, manh ntŭk kan ntoh rup bah Dak Lak...Păng jêng ndơ khlay ân nau mprơ bah Radio gŭ kan tâm Tây Nguyên lah êng ndrel Radio Việt Nam lah nsum.

Tâm 6 nau ngơi rnoi mpôl đê̆ yor Ntŭk kan Radio Việt Nam ƀư, ri bôk nau ngơi rnoi Bunong lah mhe ngăn. Nkoch lah mhe, yơn kŏ rlau 17 năm. Rnôk bôk nau ntuh kơl ntơm ƀư, 4 nŭih kan lah bu ur druh, bu klô ndăm rnoi Bunong mhe 18-10 năm geh săch tâm ăp ƀon bah n’gor Dak Nông ndrel Dak Lak. Ăp nŭih geh hăn tât Thủ đô Hà Nội ndrel ăp nŭih blau ngăn nau kan bah Radio Việt Nam ntĭm nau kan. Ntŭk kan Radio Việt Nam nkuăl Tây Nguyên jă drâu wa Điểu Kâu (nŭih geh ân lah nŭih blau ngăn nau ntĭm nau rnoi Bunong) gay ma ntĭm rblang nau Bunong. Biên tập viên Thị Đoắt, Kruanh rmôt nau ngơi Bunong, nkoch:

‘Puăn nŭih oh nô rmôt ntoh nau Bunong rnôk nê mhe lôch nti jrâu 12 dơm, ri ma ăp nau đah phung hên rnôk nê mô geh nau gĭt. Ntơm bah ƀon lan ngai ma rnăk vâl hăn tât nkuăl ƀon têh ri ma ăp ntil nê mhe mham ngăn, ma rbăng nau ntơm nau Yuăn tât nau Bunong mô nơh, nau mô ăp, nau rblang mô lăng gĭt. Rnôk nê drâu Wa Điểu Kâu hŏ ntĭm ân hên ueh ngăn, tĭng ăp rplay săm ƀŭt, nau rblang nau răk nau ngơi Bunong. Mô êng knŭng ntĭm nti nau kan ma ntĭm ân hên nau rêh tâm ntŭk pah kan kơt lah nau ngơi, nau kan đah ăp nô, yuh kan nsum ndrel nau rêh ăp nar. Gay dơi geh rmôt ntoh nau ngơi rnoi Bunong kơt nar aơ, du gưl rnơm drâu wa Điểu Kâu âk ngăn”.

Rnôk nê, bol ma hŏ âk năm, yơn bôk rngok hôm ang, bu ranh Điểu Kâu mô knŭng ntĭm rplay săm ƀŭt, ma mbơh nau vay rnoi Bunong ân ăp nŭih hên. Bu ranh rlau 70 năm ndrel 4 nŭih bu mom tâm năm 18-20 ntĭm nti rplay săm ƀŭt knŭng geh tâm VOV Tây Nguyên. Đah ăp Biên tập viên rnoi Bunong, drâu wa Điểu Kâu mô êng lah nai ntĭm rplay săm ƀŭt ma hôm lah nŭih Che, nŭih Mbŏ ŭch rŏng, leo kơn mon, sau nơm. Ndri ma, drâu wa Điểu Kâu hŏ jêng nŭih leo trong ân bôk nau ngơi rnoi Bunong. Bu ranh Y Yăm, ƀon Bu Dak, xã Thuận An, nkuăl Dak Mil, n’gor Dak Nông, ngơi:

 ‘Gâp djăt nau ngơi rnoi Bunong ntoh klơ Radio Việt Nam ntơm năm 2006 tât rnôk aơ, gâp vay djăt ngăn lah bôk nau ntoh ngơi ntĭm nti nau kan tuch tăm, kơt tăm bum, tăm ba, nau tăm tuh mbo. Gâp kŏ djăt đŏng nau ntoh nau mprơ, ăp nau mprơ bah rnoi Bunong nơm, bonh đă kon sau ntĭm nti, rêh ueh. Oh nô ntoh nau ngơi rnoi Bunong bol ma tâm ăp mpeh êng êng, kơt lah nsum rnoi Bunong Preh ƀư tơm ntoh ngơi, gâp saơ ueh ngăn, moh đah ô̆ dơi djăt da fê, ăp nau ngơi ueh ndrel geh nau dơi ngăn”./.