Ntŭk tăm Nkao Chi An ta phường 2, nkual ƀon têh Đà Lạt, n’gor Lâm Đồng aƀaơ lĕ jêng ntŭk tât uănh nsong, nti bah âk rmôt kan, êng nuĭh tăm nkao ta ntŭk.  Lĕ rngôch tâm rnôk nkra njêng yơng ntil n’hanh nkao rih ta aơ dơi rgâl đah mrô, mât uănh đah phần mềm công nghệ. Bah nĕ, nkre đăp mpăn săk rnglăy nkra njêng nkre n’hao rnoh khlay ndơ, pă an ntŭk tăch tâm dak n’hanh tăch n’gluh dak bah dih. Wa Hồ Vũ Quốc Hùng, nuĭh tơm ntŭk tăm Nkao Chi An an gĭt:

Công nghệ lah mpông pơk mô knŭng hao soan wăch rgum an nkao Đà Lạt ma hôm pơk luh ăp nău geh mhe, ăp ntil nkao mhe... bah nĕ he nkoch n’hanh pă an ntŭk tăch.

Đah rnoh neh tăm nkao rlău 10.000 ha, rnoh geh năm 2024 4,4 rmen n’ging, Đà Lạt dâk bôk năp lam dak mpeh nău kan tăm nkao. Aƀaơ nkual ƀon têh geh 400 ntil đah hang rbăn ntil nkao n’hanh dơi ntop tay ntil mhe đah trong nglăp rwăt geh sam kơp dơn.

Tĭng wa Phan Thanh Sang, Kruanh Hiệp hội Nkao Đà Lạt ndrel đah nău trôk nar, neh ntu tâm di an tăm ăp ntil nkao wăr năm, nău lăp ăp công nghệ mhe, kơt ntil, dak si phân poh, ndoh ndơ n’hanh kơt dŏng công nghệ mhe, gĭt blău mhe tâm nkra njêng lĕ ndơ̆ nău kan tăm nkao bah Đà Lạt-Lâm Đồng hun hao tâm ban đah ăp dak tâm nkual. Yơn lah, rnoh tăch n’gluh nkao Đà Lạt mhe geh nklăp 11% rnoh ndơ, n’hanh nău kan nkao bah Đà Lạt-Lâm Đồng dôl rdâng tâm rlong hô rnôk rnoh geh nkao âk dak ta rnoh âk, tâm nĕ nău tăch nkao ta lam ntŭr neh geh hŭch. Wa Phan Thanh Sang năl lah, rlău ma kơt dŏng khoa học công nghệ tâm tăm-koh n’ging, nkô̆ nău ntil lah tơm khlay gay n’hao dơi tâm rlong lĕ nkao Đà Lạt.

Tấm rgop, kan ndrel đah ăp doanh nghiệp nkra njêng ăp ntil tơm ntil bôk năp lam ntŭr neh gay kan ndrel nkra njêng tơm ntil ta ntŭk tăch Việt Nam. Bah meng nĕ, du đêt ntil nkao, ndơ nkao koh n’ging geh nău dơh êng bah Đà Lạt-Lâm Đồng ri mbra ntrôl dăng nkra njêng.

 Tĭng Tiến sĩ Phạm S, Groi kruanh UBND n’gor Lâm Đồng, ta năp ăp ntŭl rlong dôl mâp an saơ, n’gor mbran’gluh an trong hun hao nău kan nkao Đà Lạt-Lâm Đồng nâp nâl, săk rnglăy, n’ăp ta ntŭk tăch tâm dak n’hanh tăch n’gluh. Nău rƀŏng n’gluh an tât năm 2030, n’hao rnoh geh nkao lam n’gor geh 5,4 rmen n’ging n’hanh 0,5 rmen yăng ƀưk nkao ăp ntil; rnoh khlay nkra njêng nău kan nkao geh rlău 15 rbăn rmen prăk, rnoh khlay rĭng geh rlău 1,3 rmen prăk/ha, n’hanh geh prăk tăch n’gluh nkao rlău 217 rkeh đôlar.

Tât năm 2050, lĕ rngôch rnoh geh nkao Đà Lạt dơi tăch tă bah ăp ntŭk logistic mhe, đah rlău 50% rnoh ndơ nkao dơi tăch n’gluh.

Ƀư tĭng nău aơ, Hiệp hội Nkao Đà Lạt lah ntŭk kan bôk năp dơi n’gor ntĭm rđău ƀư tĭng Nghị quyết 57, lơ 22/12/2025 bah Bộ Chính trị mpeh rgâl hun hao khoa học, công nghệ, rgâl mhe mĭn ƀư n’hanh rgâl mrô ngih dak. Tâm nĕ, trong mkra khoa học-công nghệ lah tơm khlay, rgâl hao têh ngăn gay hun hao nău kan nkao n’hanh hao rnoh tăch n’gluh. Wa Phạm S, lah:

Ndâk ƀư tay nkra njêng, ntuh kơl tâm trong mkra khoa học n’hanh công nghệ, n’hanh mĭn njêng săch tay ntil. Lơn lah, he an joi ăp ntil, ăp gen ma geh âk ndơ sinh học bah n’gor Lâm Đồng gay săch ăp ntil ntĭt mpơl êng, geh êng bah Đà Lạt-Lâm Đồng geh rnoh khlay âk. An he geh tŏng ndơ gay mpla nsơ rup ndah râng tâm trong khlay lam ntŭr neh.

Nău kan nkao Đà Lạt-Lâm Đồng dôl rdâng đah ăp ntŭl rlong mô jêt tâm rnôk rgum lăp n’hanh tâm rlong lam ntŭr neh nar lơ hô. Yơn lah, đah ăp trong nchrŏng na nê̆, kơt dŏng âk khoa học công nghệ ndrel đah ăp nău rgâl tâm nkra njêng ntil nkao, Đà Lạt mô knŭng dơi mât tâm rlong, ma hôm hun hao nâp nâl, n’hao jâng nsan bah nơm tâm ntŭk tăch lam ntŭr neh./.