Ta Nkual ƀon têh Vinh, n’gor Nghệ An lĕ ƀư nkah gĭt 60 năm ndâk njêng nkual ƀon têh Vinh n’hanh wơt dơn Huân chương Độc lập hạng Nhì. Kruanh Quốc hội Vương Đình Huệ râng ƀư nkah gĭt. Nkual ƀon têh Vinh lah ntŭk wăng sa-chính trị bah Nghệ An-ƀon tơm bah Kruanh Hồ Chí Minh he n’hanh ăp nuĭh hăn lor cách mạng. Tâm 60 năm bah năp, lơn lah ngoăy 10 năm ƀư tĭng nghị quyết mrô 26 bah N’gâng kan Chính trị mpeh trong nchrŏng, nău kan hun hao n’gor Nghệ An tât năm 2020, nkual ƀon têh Vinh geh njoat hun hao lĕ rngôch, đah âk nău geh, săk rnglăy khlay.

Năm 2022, ngăch hao jêng wăng sa 9,02%; nău geh rĭng bôk nuĭh geh 120 rkeh prăk, âk rlău 2,37 tơ̆ rĭng geh nsum bah n’gor. Mbah rhơn nău geh nkual ƀon têh, Kruanh Quốc hội Vương Đình Huệ đă, n’gor an ndăn ƀư tĭng bôk nău kan hăn ndrel đah ăp trong nchrăp, tât nău rgop tâm nchră na nê̆ Dăp rgum n’gor Nghệ An rnôk năm 2021-2030 mhe dơi uănh an; mĭn lah trong uănh n’hanh trong an hun hao nkual ƀon têh Vinh tâm nău tâm boh lĕ rngôch bah n’gor Nghệ An n’hanh ndrâm dak, ƀư tĭng dăp rgum trong hun hao nkual ƀon têh Vinh-Cửa Lò, nta an hun hao wăng sa, tâm rgop ăp ntŭk ntô khlay, boăt nthoi ntŭk hành chính nkual ƀon têh n’hanh ntŭk pâl nđaih dak lêng.