Đah trong ƀư lah ăp cán bộ đảng viên mpêt nkrem dŭt đêt 10.000 prăk ăp khay, tâm bah ri aơ, âk nkuâl ta Dak Lak hŏ rgum dơi tơm prăk mpêt nkrem tât hang rmen prăk. “Prăk nkrem ƀư tĭng nău Wa” hŏ kơl âk rnăk jêr jŏt geh jay mhe, kơl an ntil si tăm ndơ mât ntop geh tay tơm ndơ gay khân păng klaih rlău jêr jŏt.

Tâm 9 năm aơ, ăp khay, nô Nguyễn Văn Tiến, cán bộ Văn phòng Đảng ủy xã Buôn Tría, nkuâl Lăk, n’gor Dak Lak lor rngleh 10 rbăn prăk gay rgop tâm “Prăk mpêt nkrem ƀư tĭng nău Wa” bah nhih pah kan. Nô nkoch: rnoh prăk rgop mô âk, trong ƀư dơh yơn hŏ nsĭt tay nău dơi tam ngăn ngăn.

Gâp saơ trong leo ƀư tơm prăk mpêt nkrem ƀư tĭng nău Wa dja geh nău tâm rŏng kon nuĭh jru hvi jêng dơi lĕ rngôch đảng viên tâm lam Đảng bộ tâm ban kơt đoàn viên ta ăp thôn buôn dŭt ŭch nđơr tĭng. Kơt đảng viên mom mpôl hên ăp khay rgop 10 rbăn prăk.

          Prăk mpêt nkrem ƀư tĭng nău Wa  lah nău nsĭt geh bah trong leo tâm rlong “Mpêt nkrem ƀư tĭng nău Wa” dơi Ban Thường vụ Huyện ủy Lắk mât mbro tâm âk năm aơ gay kơl ăp nuĭh geh nău rêh jêr jŏt. Tâm nê, ăp cán bộ, đảng viên, đoàn viên, công chức, viên chức, nuĭh kan lam nkuâl djăt ma 3 nar mpêt nkrem geh dŭt đêt 1.000 prăk; đoàn viên, hội viên tâm dâng djăt ma 10 nar geh dŭt đêt 1.000 prăk. Tơm prăk mpêt nkrem dja tă bah Ban Tuyên giáo Huyện ủy mât prăp. Wa Đào Thị Thanh An, Groi Bí thư Rnâng kan Huyện ủy Lắk an gĭt, đah trong ƀư dja tâm 9 năm aơ lam nkuâl hŏ rgop geh bơi 3 rmen prăk, ntop kơl hang rhiăng nuĭh jêr jŏt lah rnăk dơi kơl, đảng viên, nuĭh ndrô ranh, ji njreh njroi.

          “Ndơ̆ bôk nău kan dja nar lơn ma ring lam n’hanh nsĭt tay rnoh khlay ngăn ngăn gay mpơl nuih n’hâm rŏng nuĭh, rgop ring lam nău tâm rŏng tât nsum mpôl lam rêh jêng kon nuĭh tâm ban kơt nar lơn ma tâm pă ăp jêr jŏt tât ăp nuĭh geh nău rêh jêr jŏt, ndrô ranh, geh ăp nău ji jreh jroi gay khân păng geh tay nău rhơn tâm nău rêh.

         Ndrel đah nkuâl Lắk, trong ntĭt leo “Mpêt nkrem ƀư tĭng nău Wa” hŏ dơi pơk hvi, mât mbro geh nău tam ta âk nkuâl kơt: Cư M'gar, Cư Kuin, Krông Ana, Krông Bông, Krông Buk, Krông Pắk, n’hanh M’Đrắk bah n’gor Dak Lak. Tâm 2 năm aơ, trong ntĭt leo hŏ mpêt nkrem geh rlău 10 rmen prăk, bah nê  ntop kơl rdâk njêng 89 mblâm jay gŭ, 2 jrô kan nsum an nai ntĭm nti, kơl an hang rhiăng nklâm ndơ an ăp rnăk dơi kơl, nuĭh geh n’hâm suan đah cách mạng.

Du đêt nkuâl hŏ geh trong an ƀư mpêt nkrem blău mhe, rgum dơi nău tât râng bah âk mpưm cán bộ đảng viên n’hanh nuĭh ƀon lan. Ntoh lư kơt ăp trong ntĭt leo “Tĭng ƀư mpêt nkrem kơl đảng viên geh nău rêh jêr jŏt” bah Thành ủy Buôn Ma Thuột; “Rdâk njêng jay ăch chrach ta nhih nti” bah Huyện ủy Cư M’gar, “Siƀŭt mpêt nkrem Búa Liềm vàng” bah Thị ủy Buôn Hồ... wa Phạm Minh Tấn, Groi Bí thư rnâng kan Tỉnh ủy Dak Lak uănh năl: Aơ lah ăp nău kan na nê̆, ngăn ngăn n’hanh nsĭt geh nău tam tâm nău “ƀư tĭng nău Wa, tĭng ƀư mpêt nkrem” bah tâm dâng.

“Kơt nti n’hanh ƀư tĭng nău mĭn, nuih n’hâm trong gŭ rêh Hồ Chí Minh lah du nău kan way ƀư mbro. N’hanh Tỉnh uỷ hŏ rđău đă dŭt kloh bah chi bộ tâm dâng, bah ăp đảng viên ân ndơ̆ nău kơt nti, ƀư tĭng nuih n’hâm, trong gŭ rêh bah Wa jêng nău kan way ƀư mbro n’hanh n’glăp tâm nău kan sinh hoạt ăp rơh, ăp khay gay ăp nuĭh lăp gĭt tay tâm săk n’hanh tĭng ƀư gay mhâm ƀư an păng jêng du trong ntĭt leo dâk kan êng n’hanh geh nău jêng ngăn ngăn, kơp lĕ ma nău kan dơh jê̆ mô lah ăp nău kan têh kuâng, tâm nkô̆ nău gay tâm kơl nsum ndrel jut jăng ji ngot n’hŭch ach o, rdâk njêng ƀon lan mhe, lôch jêh ăp nău dơn kan dơi jao”.

           Mô dơn lah trong leo ƀư, “Mpêt nkrem tĭng nău Wa” hŏ jêng du nău kan way ƀư mbro dơi ăp cán bộ, đảng viên n’hanh ƀon lan ta Dak Lak tĭng ƀư du trong dâk đăt êng. Trong ƀư dơh  yơn rnoh khlay n’hanh nău ring tam têh, nsĭt nău rhơn an âk nuĭh ach o bah ăp jay têh hvi, mô lah nău ntop kơl năn ngăch rnôk jêr jŏt rmoh rman. Nău kan dja hŏ ntik hvi nău way ơm “tâm pêt tâm mât” uĕh lăng bah rnoi nuĭh he, lah du trong ƀư ngăn ngăn gay kơt nti n’hanh ƀư tĭng trong gŭ rêh nuih n’hâm Hồ Chí Minh.