Nai nti nuĭh K'Ho Ka Duys lĕ geh 6 năm krêp dêh đah Ngih sam ƀŭt THCS Tân Thượng, xă nkual jru Đinh Trang Thượng. Nti Ngữ văn ta ngih sam ƀŭt geh rlău 95% kon hŏk lah nuĭh K'Ho, păng saơ du nău mô tâm di: âk kon hŏk gĭt răk, gĭt nchih nău yuăn yơn mô gĭt răk, nchih nău me deh. Bah nău mĭn rvê nĕ, năm 2022, dơi Ban Giám hiệu ntop kơl, Ka Duys ƀư jrô nti nău ngơi K'Ho bôk năp ta ngih sam ƀŭt đah 40 kon hŏk jrô 7. Bôk năp lah ntĭm rplay sam ƀŭt, jêh nĕ păng joi tât ăp nghệ nhân tâm nkual nti trong tŭr chĭng goh gong, njroh xoang jêh nĕ ndơ̆ ăp nău gĭt nĕ tâm ăp nău ƀư an kon hŏk. Nai nti Ka Duys nkoch, ăp mông nti mô knŭng kơl răk, nchih dơi nău K'Ho ma hôm gĭt tay nău khlay văn hóa rnoi nơm. "Lah nuĭh K'Ho gâp saơ lah aƀaơ lah mô mât ndray nău way ơm rnoi nuĭh ri jêh aơ tay mbra mbrơi mbrơi roh hêng. Bah ăp nău ƀư jêt bah ăp băl kon se nti aơ lah ăp ŭnh ang gay ăp oh dơi gĭt ăp nău khlay văn hoá, ăp oh dơi sŏk ăp nău gĭt nĕ ăp oh mât ndray, mât uĕh nău way ơm bah nuĭh K'Ho".

Ta ăp ngih săm ƀŭt nkuăl rnoi mpôl đê̆ bah Lâm Đồng, âk nai ntĭm kŏ dôl joi trong hăn ndrel đah kon se nti tă bah ăp nau kan ngăn. Nai ntĭm Nguyễn Thị Hương Giang, Kruanh rmôt kan, Ngih săm ƀŭt THPT Phan Đình Phùng, xã Đam Rông, ân lah nau ŭch rŏng kon se geh ntoh tă bah nau nchrăp ueh ăp nau ntĭm nti, nsôih tâm ăp nau kan ntĭm nti. Năm nti mhe rlau ăp kon se nti bah ngih săm ƀŭt yor wa Giang mât hŏ geh 9 giải kon se nti blau gưl n'gor ndrel 4 đề tài geh giải STEM gưl ngih săm ƀŭt. "Nơm geh nău rŏng kon se nti ri nơm mơ pơk trong an ăp oh dơi. Đah kon se nti jêr jŏt ri mô knŭng ntĭm tâm ndrôm sam ƀŭt ma gâp leo kon se nti hăn uănh ta ntŭk bah meng dak me Krông Nô gay ăp oh nti dơi ăp nău mpeh ntŭk gŭ rêh, neh ntu, dak me. Gâp mĭn lah bôl geh jêr jŏt tât ntŭk ri nai n'hanh kon se nti ân tâm rlong ntĭm uĕh n'hanh nti uĕh ngăn".

Đah ăp nai ntĭm ta nkual jêr jŏt, ŭch rŏng kon hŏk mô knŭng lah mât uănh tât ăp rnoh điểm. Nĕ hôm lah nău joi trong gay ăp oh mô ntlơi nti, kơl ăp oh geh nău rêh jêr jŏt tât tay ngih sam ƀŭt, njêng ntŭk ntô gay kon hŏk rnoi mpôl đê̆ nsing nơm mpơl săk nơm. Nuih n'hâm nê hôm dơi nai ntĭm Nguyễn Quốc Huy, Bí thư Chi bộ, Hiệu trưởng Ngih sam ƀŭt THPT Nguyễn Trường Tộ, xă Tân Hải, tĭng jăp tâm 22 năm ƀư nău kan. Nô tă 5 tơ̆ geh nău nkhôm Chiến sĩ thi đua gưl bah dâng. Đah nô Huy, nău khlay ngăn lah ndâk njêng du ngih sam ƀŭt ma kon hŏk ŭch tât ăp nar. Bâh nău mât uănh, dŏng kan bâh cán bộ, nai nti tât nău djăt nău mĭn kon hoc an geh mpŏng tât du ntŭk ntĭm nti ueh mhe. "Wa Hồ way ntĭm he mpeh nău rŏng kon nuĭh. Ngih sam ƀŭt rhơn răm lah ntŭk nău mĭn rŏng nuĭh dơi ƀư ngăn. Cán bộ mât uănh ri way djăt nău rgop bah nai ntĭm nti. Nai ntĭm nti ri gĭt wât dơi nău mĭn bah kon hŏk. Nti Wa lah ƀư tĭng du ntŭk ƀon lan ƀư tơm ăp nău ngơi dơi uănh khlay, nê lah tơm bah văn hoá ngih sam ƀŭt nâp nâl."

Bâh nău nti rplay săm ƀŭt, nti nău gĭt blău tât mât rbăy nău ngơi, nău ueh êng mpôl rnoi n'hanh rdâk njêng ntŭk ntĭm nti kon nuĭh, ăp nai, ăp cô ta nkual njônh ngai Lâm Đồng dôl mbrơi mbrơi geh ăp "grăp ntil" nău gĭt blău n'hanh nău knơm an kon hŏk. Ăp mông nti, ăp nău kan rlong ƀư mô lah nău mât uănh an ăp nău rêh kon hoc lĕ ntop kơl ăp oh lơn ma ŭch đah ngih nti, ŭch đah nău ueh êng mpôl rnoi n'hanh nsing nơm lăp tâm nău rêh let năp tay.