Tâm ƀon Trấp, xã Cư M’gar, ăp trong jê̆ geh nkŭm n’hâm ma tơm si, ăp trong kao ueh tâm nâm dang ueh tâm bri duh nar. Ueh ngăn lơn lah rip bah ăp n’ha cờ manh êr mpăr tâm sial, ƀư ueh tay tâm ƀon lan, leo nau ntô̆ rhơn rnoi mpôl. H’Hằng Êban, du băl mom tâm ƀon Trấp nkoch:

 ‘Geh jao đă hăn yông n’ha cờ tâm trong hăn bah ƀon, gâp saơ rhơn ngăn. Nau yông n’ha cờ kơl gâp gĭt lơn mpeh nau vay ơm cách mạng bah rnoi mpôl, nau ueh ang bah Đảng ndrel gâp rŏng ƀon lan nơm”.

     Trong ƀon Trăp jong du km, ntơm bah nar hội tâm rnglăp, jêh nê lŏ lah ntrŭnh ƀư rnôk Đại hội Đảng. Kruanh ƀon Y Suinh Byă, nkoch:

“Rnôk ntrŭnh nau yông n’ha cờ, kônh wa ăp nŭih rhơn da dê. Ăp ngih rvăy êng du n’ha cò, yông êng. Cờ Đảng ri ăp ngih lah đảng viên bu yông, hôm cờ neh dak ri ăp ngih kŏ yông, gay rhơn neh dak”.

 Ntơm ƀon Trấp, nau kan yông n’ha cờ neh dak hŏ rêng lam. Xã Cư M’gar rnôk aơ geh 7km trong cờ, geh ăp trong tơm ndrel ăp 11 thôn, ƀon. Wa Hồ Thị Thanh Hải, Groi Bí thư rnâng kan xã Cư M’gar nkoch:

‘Rnôk aơ geh 11 thôn kŏ nkra, ƀư nâp ueh trong cờ ntŭk nơm ndrel yông n’ha cờ neh dak, cờ Đảng rhơn ƀư mhe tâm trong hăn. Rnôk hăn tâm trong cờ bah ƀon ri nuih n’hâm ntô̆ n’hao, rhơn tâm săk jăn nê kŏ lah ngoai tâm ăp nau kan ndâk njêng nau tâm rnglăp lam rnoi mpôl kŏ kơt lah mât neh dak”.

Tâm thôn Tiến Thịnh, xã Quảng Tiến, nkuăl Cư M’gar, ăp rnăk vâl kŏ geh yông cờ bah năp mpông ngih tâm ăp rnôk geh lễ, ngăn lah tâm nar Tết năm mhe mô lah Nar ndâk njêng Đảng. Đah bơi tât 400 rnăk, thôn Tiến Thịnh lah ngoai tâm ăp nkuăl bôk năp ƀư nau kan ntrong cờ. wa Nguyễn Tấn Chờ, Kruanh thôn Tiến Thịnh, mbơh:

‘Rnôk du ƀon geh trong cờ ri ma nau rhơn bah nkuăl. Trong cờ bah thôn Tiến Thịnh lah thôn bôk năp ƀư trong cờ, lah trong leo lor bah nkuăl. Rnơm ryơk n’ha cờ kŏ kơt lah nơm ryơk neh dak, ri ma nơm yông n’ha cờ đah nuih n’hâm ntô̆ n’hao ngăn”.

Nau ƀư trong cơg aơ tâm thôn Tiến Thịnh, xã Quảng Tiến geh ntrŭnh ntơm năm 2026, jêh nê ngăch rêng tâm 6 thôn, ƀon tâm xã. Wa Nguyễn Thị Thanh Vân, Groi Kruanh UBND xã Quảng Tiến mbơh:

 ‘Bah năp nơh ăp nŭih ƀon lan bu yông cờ tĭng nau geh dơi bah nơm, jêh nê xã rgŏ jă ƀư 6 tâm 6 thôn ƀư trong cờ, tât rnôk aơ ăp thôn kŏ ƀư trong cờ ndrel ƀon lan kŏ tâm ban nuih n’hâm ueh ngăn đŏng”.

 Trong cờ neh dak tâm nkuăl Cư M’gar hŏ rgop nau ndâk nau rhơn bah rnoi mpôl, ntrŭt đă nuih n’hâm tâm rlong hun hao văng sa, ơm yau tâm nkuăl. Wa Nguyễn Thiên, Groi Bí thư rnâng kan nkuăl uỷ Cư M’gar mbơh:

 ‘Ăp xã, nkuăl têh ndâk ƀư trong cờ ntơm năm 2020. Bôk năp ngăn lah ƀư tâm nklang xã, rnôk aơ du đê̆ xã nkuăl têh hŏ pơk hvi trong n’ha cờ tâm ăp trong tơm bah thôn, ƀon, tổ dân phố. Ndâk nkra trong cờ gay bonh đă nkoch trêng ân Đại hội Đảng ăp gưl ndrel kŏ lah nau nơih lơn tâm nau kan bonh đă nkoch trêng tâm ăp rnôk Lễ ƀư nkah bah neh dak”.

 Ăp trong yông n’ha cờ chăng mănh êr dôl mpar bah năp tơm sial năm mhe lah nau mpơl ueh ngăn ân ăp nau dơi tâm nau ndâk njêng ƀon lan mhe tâm xã Cư M’gar, Dak Lak nar lơn sâm geh, ueh nâp./.