Ôi aơ 21/10, ta Hà Nội, ntơm ƀư Rơh rƀŭn tal 8, Quốc hội khóa 15. Nchrăp dĭng lĕ nar pah kan bah Rơh rƀŭn lah 29 nar n’gul. Ta rơh rƀŭn aơ, Quốc hội mbra uănh mĭn tay, mbơh an 15 luật, dôl uănh lah Luật njrăng n’gang ŭnh sa, puh nset ŭnh sa n’hanh wơt kơl nău rmanh; Luật nkra rgâl, ntop du đêt điều bah Luật Bảo hiểm y tế; Luật njrăng n’gang tăch rwăt nuĭh (nkra rgâl); Luật Công đoàn (nkra rgâl)...

Quốc hội mbra uănh mĭn tay, an regop 13 nău nchrăp ƀư Luật, dôl uănh lah nău nchrăp ƀư Luật Điện lực (nkra rgâl); nău nchrăp ƀư Luật Nhà giáo; nău nchrăp ƀư Luật Soay geh prăk doanh nghiệp (nkra rgâl); nău nchrăp ƀư Luật nkra rgâl, ntop tay du đêt điều bah Luật Quảng cáo. Ta rơh rƀŭn tal 8 Quốc hội uănh lah jêh ƀư tĭng trong nchrăp hun hao wăng sa-rêh jêng, tơm prăk ngih dak năm 2024 n’hanh uănh mĭn tay, ntrŭnh trong nchrăp hun hao wăng sa-rêh jêng, nchrăp trok prăk ngih dak, trong tâm pă tơm prăk trung ương năm 2025; uănh mĭn tay ăp nău mbơh mpeh trong kan tư pháp, njrăng n’gang sa khâm, njrăng n’gang nău tih n’hanh tih dôih pháp luật, mkra nău dăn đă bah nuh ƀon lan.