Măng 10/3, Groi Thủ tướng Chính phủ Trần Hồng Hà ndrel ntơh măt ăp n’gâng kan, kruanh rđău kan ăp n’gor, năch dak bah dih, n’hanh ƀon lan n’gor Dak Lak hŏ râng nar ntơm pơk Lễ hội cà phê Buôn Ma Thuột tâl 9. Lah ta rnôk ntơm pơk, Groi Thủ tướng Trần Hồng Hà lah rjăp: Lễ hội Cà phê Buôn Ma Thuột rơh dja lah nar kan dŭt geh nkô̆ khlay, ƀư di tâm rnôk nkah ndray 50 năm lơh dơi Buôn Ma Thuột.

Lễ hội mô dơn lah nar mpư rnê găr cà phê Việt Nam, ma hôm lah rgum nchră têh tâm ban lam ntŭr neh, ntŭk ăp dak nkret njêng n’hanh tăch cà phê wăch rgum, ndrel nkoch trong uĕh têh jong bah  n’gâng kan cà phê. Năm 2024, lor bôk năp tăch n’gluh cà phê Việt Nam rlău 5 rmen USD, năl di tay nău khlay lah ntŭk tơm tăch cà phê têh dâk tâl bar lam ntŭr neh, bah kơi Brazil. Tâm nê, Dak Lak - “Tơm me cà phê bah Việt Nam” rgop nklăp 18% nsĭt geh tăch n’gluh. Groi Thủ tướng dăn đă: let năp tay, ăp n’gâng kan, ăp n’gor, Hiệp hội cà phê – ca cao Việt Nam, ăp doanh nghiệp nkoch nsum mpeh trong uĕh têh jong, kan nsum lhăt gay rdâk njêng nkual tăm cà phê săk kah âk; rdâk njêng rêng rnoh khlay jŏ jong.