Rgop nau tâm rơh rƀŭn, Kruanh Quốc hội Trần Thanh Mẫn lah rjăp tay du tŏ đŏng nau rgop tâm nau nchrăp ntrŭnh bah Quốc hội rgâl nkra, ntop tay du đê̆ điều bah Hiến pháp năm 2013 geh ƀư tâm 8/120 điều đah 2 rmôt nau ntrŭnh tât Mặt trận Tổ quốc Việt Nam, ăp ntŭk kan chính trị, rêh jêng ndrel ăp nau ntrŭnh tâm Chương IX gay ƀư nau kan n’gâng kan 2 gưl, mô pơk hvi ăp nau êng.

            Kruanh Quốc hội ân lah, rnôk aơ ƀon lan, cử tri dôl kâp rnơm nau ƀư rtŭt gleh trong kan, nau kan tam, nâp. Yor tâm nau ngăn, rơh rlau aơ, Đảng, Ngih dak hŏ ntrŭnh âk nau geh tât ntrong kan ƀư rmeh âk biên chế:

            ‘Rơh aơ nơm ƀư nau ntrŭnh rtŭt gleh ntrong kan tĭng nuih n’hâm nau ntrŭnh mrô 18. Aơ lah du nau ntrŭnh tâm di nuih n’hâm ƀon lan. Nau ŭch bah Đảng, tâm ban nau mĭn ƀon lan. Ŭch ƀư dơi ăp nkô̆ aơ ri rơh bar jêr ngăn. Jêr lah ân rgâl Hiến pháp. Nơm hŏ nchră luh nau ndâk Uỷ ban nau nchrăp rgâl nkra, ntop tay du đê̆ điều bah Hiến pháp năm 2013 hŏ mbơh hôm, nau nchrăp rgâl Hiến pháp ndrel du đê̆ nau rgop đă bah ƀon lan ntơm lơ 6/5 tât lơ 5/6 tâm du khay, rgum tâm 5 nar, dĭng lĕ lah 35 nar”

            Kruanh Quốc hội kŏ ân lah, nau rgâl nkra, ntop tay du đê̆ điềubah Hiến pháp năm 2013, rmôt nau ƀư jêh ăp nau ntrŭnh ntĭm đă gay rgâl Hiến pháp, ƀư jêh nau kan pháp luật ndrel ăp nau ntrŭnh ân hăn lor du nhoat, gay njêng trong kan pháp lý nâp nâl ân nau ƀư.

            Ăp ntoh măt Quốc hội ân tâm ban nau đah 8 Điều rgâl nkra tâm nau nchrăp nau ntrŭnh rgâl, ntop du đê̆ điều bah Hiến pháp năm 2013. Tâm nê, nau ntrŭnh ƀư kloh nau dơi ndrel nau kan bah ăp ntŭk kan chính trị-rêh jêng kơt: Công đoàn Việt Nam, rmôt nŭih ƀon lan kan lŏ mir Việt Nam, Đoàn druh ndăm Cộng sản Hồ Chí Minh, rmôt bu ur Việt Nam, rmôt tahen ơm Việt Nam lah ăp ntŭk kan chính trị, rêh jêng tâm rmôt kan Mặt trận Tổ quốc Việt Nam, đăp mpăn tĭng nau ntrŭnh mrô 127 bah Bộ chính trị.

            Tĭng wa Nguyễn Thị Thu Nguyệt, rmôt kan bah Dak Lak, êng ăp ntŭk kan chính trị rêh jêng tâm Mặt trận Tổ quốc Việt Nam hôm geh ăp rmôt ƀon an, dôl ƀư nau kan bah Đảng ndrel Ngih dak. Ndri ma, ntoh măt đă, Rnâng kan nchrăp săch nau ntrŭnh rgâl nkra, ntop tay du đê̆ điều bah Hiến pháp năm 2013 uănh, ntrŭnh nau kan pháp lý bah ăp ntŭk kan aơ:

            ‘Nau dơi pháp lý bah ăp rmôt kan nsum mpol tâm Uỷ ban mặt trân tĭng nau ntrŭnh rmô 127 ntoh tâm Hiến pháp mhâm ƀư, nơm ân geh ƀư kloh. Mô dơi ân geh nơm ndŏ tâm du nau nsum lah ân geh tâm rgop ăp nau kan đah Mặt trận ri ê tŏng ăp, ê njêng trong kan pháp lý ân ăp rmôt aơ pah kan tĭng nau dơi bah Hiến pháp, pháp luật ndrel rgâl tĭng nau ntrŭnh bah Chính phủ, jêh geh Hiến pháp rgâl nkra”.

            Du đê̆ nau đă bah ntoh măt hôm rvê, ta Điều 110, nkô̆ 3 ntrŭnh, nau năl ăp ntŭk kan hành chính tâm dâng gưl n’gor, nkuăl ƀon têh tâm Trung ương ndrel nau ƀư, nau ndâk, ân nsrŭng kan, ân rnglăp, pă rmôt kan hành chính, rgâl nau kan hành chính Quốc hội ntrŭnh. Tâm rnôk, tĭng Hiến pháp năm 2013, nau aơ ân sŏk nau rgop bah ƀon lan. Wa Nguyễn Minh Hoàng, rmôt kan bah nkuăl ƀon têh Hồ Chí Minh, mbơh:

            ‘Nau ndâk, rjaih gay ma rnglăp, pă rmôt kan hành chính, rgâl ntŭk pă ƀư nau kan yor Quốc hội ntrŭnh. Nau ntrŭnh aơ ân geh sŏk nau rgop bah ƀon lan tâm nkuăl, tĭng nau dơi, nau nau ntrŭnh đăl. Ta aơ gâp knŭng rvê nơm mô geh mbơh kloh mhâm ƀư nơm jăng lơi nau kan, tâm rnôk nau aơ ƀư ueh nau dơi bah ƀon lan ƀư tơm mpeh tâm dâng, ƀư tĭng nau rgop bah ƀon lan tâm ntŭk đah nau kan khlay ndrel kŏ ntoh nau mĭn ŭch bah Đảng nuih n’hâm ƀon lan”.

            Wa Nguyễn Thành Trung, rmôt kan Yên Bái mbơh nau:

            ‘Nau nchrăp rnôk aơ ntrŭnh sŏk nau rgop bah ƀon lan tâm nkuăl rnôk ndâk nau ƀư rjaih, rnglăp mô lah rgâl nkual neh, ntŭk kan hành chính ma mra lah Quốc hội ntrŭnh đă. Gâp ân lah đah nau kan pháp lý, mât ngih dak ndrel nau rêh ri nau sŏk nau rgop bah ƀon lan rnôk ndâk, ân rjaih, pă nkhah rmôt kan hành chính, rgâl nkra ntrong gŭ kan lah nau kan khlay ngăn”./.