Ôi 2/10, ta Nhih pah kan Trung ương Đảng, ta nâm nău  ƀư tơm bah Tổng Bí thư Nguyễn Phú Trọng, tâm nchră tâl 8 Ban chấp hành Trung ương Đảng khoá 13 hŏ ntơm pơk rgum.

Ta tâm nchră dja, Trung ương nchră n’hanh an nău rgop n’glôch jêh mpeh ăp nkô̆ nău bah kơi aơ: Nô nău wăng sa- rêh jêng kon nuĭh, ngân sách ngih dak năm 2023, trong nchrăp năm 2024; Trong nchrăp prăk kaih - ngân sách ngih dak 3 năm 2024 - 2026 n’hanh trong tor gĭt lor tĭng ƀư trong kơl prăk khay mhe; N’glôch jêh 10 năm tĭng ƀư Nghị quyết Trung ương 5 khoá XI mpeh du đêt nkô̆ nău rêh jêng kon nuĭh lvang năm 2012 – 2020; N’glôch jêh 20 năm tĭng ƀư Nghị quyết Trung ương 7 khoá IX mpeh ntô̆ n’hao suan dăng tâm rnglăp lam rnoi nuĭh yor an neh dak geh ndrŏng, têh dăng, nău rêh geh nău tâm ban, gĭt blău kloh rsang; n’glôch jêh 15 năm tĭng ƀư Nghị quyết Trung ương 7 khoá X mpeh rdâk njêng rmôt nuĭh gĭt blău rơh ntrôl dăng công nghiệp mhe, têh uĕh mhe neh dak; n’glôch jêh 10 năm tĭng ƀư Nghị quyết Trung ương 8 khoá XI mpeh trong mât njrăng neh dak tâm nô nău mhe; dăp rgum Ban Chấp hành Trung ương Đảng khoá XIV; n’hanh du đêt nkô̆ nău khlay êng ƀa ƀă. Lah ta rnôk ntơm pơk tâm nchră, Tổng Bí thư Nguyễn Phú Trọng dăn đă Trung ương n’hanh ăp nuĭh râng tâm nchră ntô̆ n’hao tay bôk rngok gĭt blău, mpư n’hao nuih n’hâm dơn kan, rgum gŭ mĭn, tâm nchră na nê̆, an nău rgop ƀư lôch jêh ăp nău  mbơh, đề án n’hanh mĭn uănh, n’glêh an tâm kêng dŭt rơh hop. Nchrăp rơh pah kan jŏ tât nar 8/10./.