Kêng măng 27/2, UBND n’gor Dak Lak ƀư rơh hop gay djăt nău mbơh mpeh rgâl mhe tĭng ƀư gâl 3 bah Trong nchrăp cao tốc Khánh Hòa – Buôn Ma Thuột. Nchrăp ƀư trong cao tốc Khánh Hòa-Buôn Ma Thuột (gâl 3) jong rlău 48 km, đah lĕ rngôch rnoh ntuh kơl 6.765 rmen prăk. Tât aƀaơ ăp đơn vị ƀư trong hŏ ƀư lôch jêh trong lăp, rmlông dak sor ta njăr trong n’hanh mon 22 ntung, geh 75%. Yơn lah, rnoh ngăch n’gluh tơm prăk dơn geh 1.525 rmen prăk, geh 37%.

Ban mât uănh trong nchrăp ntuh kơl rdâk njêng ntung trong n’hanh tuch tăm hun hao ƀon lan n’gor Dak Lak, an gĭt nkô̆ lah tă bah ăp nuĭh tơm ƀư mô hŏ rgum ndeh rklư gay ƀư tâm pleh âk tơ̆, âk mpôl kan; tơm neh lŭ mô năn ngăch. Lah ta rơh hop, wa Trương Công Thái, Groi kruanh UBND n’gor Dak Lak dăn đă nuĭh tơm ndranh me n’hanh nuĭh tơm ndranh groi tĭng ân nsrôih gay n’hao âk ndeh rklư, ndơ dŏng kan n’hanh kon nuĭh gay đăp mpăn rnoh ngăch n’hanh n’hao âk tơ̆ pleh kan n’hanh âk mpôl kan ri ân tĭng ƀư jăp. Tât rnôk nuĭh ndranh groi tĭng mô đăp mpăn rnoh ngăch kan ri ân dŭt bah tâm boh kan đah nuĭh tơm ndranh groi tĭng, nuĭh tơm ndranh me ân dơn nău kan đah nuĭh tơm ntuh kơl.