Nkuăl Krông Bông, n’gor Dak Lak jong hvi bah dâng dôr Chư Yang Sin prêh ngai rai. Ăp nar nchrăp an lễ hội cà phê, nkah gĭt 50 năm rklaih đăp mpăn n’gor, tĭng njok trong yông cờ chăng; ăp ntŭk pâl nđaih dơi nkra, ƀư mhe đah âk tơm si uĕh, nchrăp wơt năch. Yôk prêh, bri ngih dak mât n’hanh ăp ƀon mper dôr Chư Yang Sin, mông nar lah ăp ntŭk tât uĕh an năch ŭch pâl nđaih ntŭk gŭ rêh, joi uănh bri dak neh ntu... ma hôm lah ngih sam ƀŭt ta ntŭk ngăn mpeh lịch sử 10 năm tâm lơh tâm su mprơh Mỹ (1965-1975), lah ntŭk bri nking n’gang cách mạng, bri njrăng mpô mpa bri. Lĕ bơi 100 năm, wa Lê Chí Quyết, tă ƀư Groi Bí thư N’gor ủy Dak Lak, hôm e nkah gĭt nâm ơm 10 năm pah kan bah nơm ta nkual ntŭk nsing nơm aơ.  

Ngih pah kan rnâng kan N’gor ủy, ngih pah kan ntĭm rđău bôk năp bah Mpeh bah Dâng aơ, geh Văn phòng N’gor ủy, chánh, groi văn phòng, ăp nuĭh văn thư, gŏ máy, mât mpôn, cơ yếu, radio. Rơh rƀŭn bôk năp bah rnâng kan n’gor ủy ta aơ tâm nchră 2 nău, bôk năp lah an dun n’gang, mât nâp ntŭk ƀư nsing nơm mpeh bah dâng mô an rlăng lơh in, nkre ndâk ƀư tĭng gưl jêng ntŭk nsing nơm, gay nthoi jêng nkual ƀư ntŭk nsing nơm lôch uĕh bah n’gor bah mpeh Bắc hăn Nam.

Đah Bu nai Hà Ngọc Đào, tă ƀư Giám đốc N’gâng kan ntĭm nti Dak Lak, nkual ntŭk ƀư nsing nâp H9-Krông Bông nkre lah ngih sam ƀŭt, nkre lah ntŭk tâm lơh n’hanh lah ntŭk tuch tăm, yor ăp nai mom n’hao an Dak Lak lĕ ƀư tĭng 3 nău kan: ntĭm nti, tuch tăm ndơ sông sa n’hanh hăn tâm lơh. Wa Hà Ngọc Đào nkah tay, H9 lah nkual neh deh âk nuĭh janh dăng.

Gâp lăp ta aơ năm 1965, tât nar rklaih đăp mpăn ta aơ 10 năm. Âk nuĭh geh sôt rmanh bah aơ n’hanh têh jêng bah aơ. Geh âk nuĭh janh dăng, kơt anh hùng Y Ơn, têh jêng bah ntrong leo du kích, ntrong leo cách mạng ta Krông Bông. Anh hung Ama Lê-anh hùng rmôt vũ trang têh jêng ta aơ đŏng jêh nĕ khĭt n’hanh dơi n’hao an nuĭh janh dăng. Jêng rnôk plơ̆ sĭt ta aơ tâm săk gâp rngot âk, nkah gĭt mpôl băl, nkah gĭt oh nô, nkah gĭt kônh wa, nkah gĭt ntŭk tâm lơh.

Ta tâm lơh tâm su rŭn soan, hô ngăn, nuĭh ƀon lan ăp ƀon bah dâng jâng yôk Chư Yang Sin mô n’hoach n’hâm soan, nău rêh, mât njrăng nkual ƀư ntŭk nsing nâp tâm lơh, pơk hvi nkual rklaih đăp mpăn. Kônh wa ăp rnoi nuĭh ta aơ lĕ nking n’gang an cách mạng , gay 3 rơh đđại hội Đảng bộn’gor ƀư ta aơ đăp mpăn. Wa Y Suôm Niê, gŭ ƀon H Ngô A, xă Hoà Phong, nkuăl Krông Bông nkoch:

Du hê du nău kan, tĭng soan bah nơm. Kôih srông ri jao an, ntĭt nsa jêt ri 100s srông, nuĭh têh ri 100 srông, rgop gay djôt hăn chŭt srông ta nkual n’har bri đah rlăng đah tahen cách mạng. Jêh nĕ hăn tăm bum, jêt tăm 500 tơm, têh tăm rbăn tơm. Gay sŏk bum nĕ choh jêt, ih kro jêh nĕ djôt tât kơl an tahen hăn lơh rlăng.

Yor tâm rnglăp, du nuih n’hâm bah tahen n’hanh ƀon lan lĕ nta nơih an N’gor ủy Dak Lak ntĭm rđău ƀon lan ăp rnoi nuĭh hăn bah lơh dơi aơ tât lơh dơi êng, jêng jâng nsan lơh dơi ta Buôn Ma Thuột, rklaih đăp mpăn n’gor Dak Lak, rgop an lơh dơi têh yan puh 1975, kơp dơn neh dak. Wa Y Thức Êban, Groi Kruanh UBND nkuăk Krông Bông an gĭt, Nkual ƀư ntŭk nsing nâp tâm lơh tâm su n’gor Dak lak lĕ dơi kơp dơn lah ntŭk ơm yău kăl e gưl ngih dak bah năm 2017, jêng ntŭk an ntĭm nti way ơm cách mạng an rơh druh ndăm.

Aơ lah du ntŭk an mpôl hên ntĭm nti tay nău way ơm cách mạng, lơn lah đah rơh druh ndăm. Tâm năm tât, nău hun hao pâl nđaih, mât uĕh nău khlay mbra dơi mât uĕh nâp dăng lơn đah nău ƀư lĕ soan ngăn ngên, lơn lah ăp rơh kơn druh ndăm ƀa ƀơ ƀư ăp nău ƀư ntĭm nti way ơm, nkah gĭt tay n’hâm soan têh bah u che, lĕ janh dăng tâm lơh, roh nting mham yor đăp mpăn, yor đăp mpăn bah ƀon tơm, bah neh dak.

Bah kơi 50 năm rkalih đăp mpăn nkual ƀư ntŭk nsing nâp tâm lơh tâm su kăl e bah n’gor Dak Lak (aƀaơ lah nkuăl Krông Bông) dôl rgâl săk tĭng nar đah nău du nuih n’hâm ndâk njêng bah n’gâng kan ƀon lan n’hanh nuĭh ƀon lan. Ăp mir cà phê uĕh nđĭr nkŭm lam nkual neh tă geh rlăng phah n’hanh krih dak si khih. Ăp sôt têl kăl e lĕ jêng ntŭk ơm yău, mbra mro mrăng hôm e tâm bôk rngok nuĭh ƀon lan n’hanh ăp rơh bah kơi ta Krông Bông lah êng, Dak Lak lah nsum, nău ntô̆ n’hao mpeh du rơh dun n’gang janh dăng.