Ntơm bah bôk năm tât aƀaơ, nuĭh ƀon lan ta nkuâl n’har bri Đức Cơ, n’gor Gia Lai hŏ ndơ̆ jao an mpôl công an bơi 70 phao bleo njêng êng ndrel du đêt nsiu rtoh. Mpôl công an kan nsum tay ndrel ăp n’gâng kan, nsum mpôl nkoch trêng, rgŏ jă nuĭh ƀon  lan mô ƀư njêng êng, mât prăp, dŏng ăp ntil ndrak nsiu phao bleo gay mât đăp mpăn rnă njrăng.

Xã n’har bri Ia Nan, nkuâl Đức Cơ, n’gor Gia Lai, geh rlău 8000 nuĭh, lơn âk lah nuĭh rnoi mpôl đê̆ gŭ rêh. Đah ntŭk gŭ têh hvi, ƀon lan srang ngai, âk nuĭh ƀon lan way ƀư njêng êng phao bleo hăn nchron pănh. Trung tá Đỗ Giang Nam – Kruanh Công an xã Ia Nan, nkuâl Đức Cơ an gĭt:

“Ta ntŭk Ia Nan geh 3 ƀon rnoi mpôl đê̆, lơn âk kônh wa ƀư mir ba. Geh nău lư du đêt kônh wa mpôn prăp phao bleo, ndrak nsiu rtoh ta mir ba mô nsĭt jay. Mpôl Công an xã kan nsum na nê̆ đah mpôl tahen n’har bri, mpôl tahen ta ntŭk nkoch trêng, rgŏ jă ăp druh ndăm ta thôn ƀon way dŏng phao njêng êng gay hăn nchron pănh.”

Ăp cán bộ công an kan nsum đah bu ranh ƀon, nuĭh geh nsing nơm gay rgŏ jă ăp nuĭh ƀon lan dôl dŏng phao bleo ƀư njêng êng, ndrak nsiu rtoh ndơ̆ tay an mpôl kan dơi kan. Ntĭt kơt wa Rơ Châm Míu, nuĭh geh nsing nơm ta ƀon Nú, xã Ia Nan way ndop tâm ăp rơh sinh hoạt gay ntrŭt nsôr kônh wa tĭng jăp pháp luật, rêh tâm lăp nsum, way tâm rŏng, tâm kơl nsum tâm nău kan tuch tăm, mô mât prăp ndrak nsiu phao bleo ƀư njêng êng.

          “Dŏng phao ri mhe aơ gâp nkoch trêng âk nuĭh đŏng, ndơ̆ jao tay an xã, yor rnôk ngêt nhŭl ndrănh, ri sŏk phao pănh ri mhâm ƀư jêng mpôl công an n’hanh tahen n’har bri nkoch trêng gay nuĭh ƀon lan ntlơi jăng mô dŏng phao yor păng lơh khuch an săk nơm n’hanh rnăk wâl” 

Thiếu tá Nguyễn Thành Duy – Groi kruanh Công an xã Ia Dom, nkuâl Đức Cơ an gĭt, ndrel đah nău ntrôl dăng nkoch trêng rgŏ jă, ăp mpôl tahen n’har bri ân rƀah gĭt nău lư tâm dâng, ân ntik n’hao nău khlay kan bah nuĭh ƀon lan tâm mât đăp mpăn rnă njrăng:

“Công an xã ndrel ăp n’gâng kan ndrel rgŏ jă, nkoch trêng kônh wa ta ăp thôn, ƀon ndơ̆ jao ndrak nsiu, phao bleo. Ntoh du đêt jêr jŏt lah du đêt druh ndăm rchong rvăt ndơ ntrŭp ƀư phao bah ăp nuĭh tăch ta trôm mạng xã hội gay ntrŭp njêng êng. Công an xã sŏk mplơ̆ geh 2 ndơ ntrŭp n’hanh ndơ̆ jao an Công an nkuâl rmal tĭng di nău way.”

Ntơm bah bôk năm tât aƀaơ, kônh wa hŏ ndơ̆ jao an Công an nkuâl Đức Cơ lĕ rngôch 70 n’gâr phao n’hanh ndơ rnă săk, ndrel du đêt ndrak nsiu rtoh, ndơ ntrŭp njêng êng phao./.