Mhe njŭn mpôl năch pâl nđaih tât uănh ƀư ngăn ăp ntŭk pâl nđaih ta Buôn Trí B, xă Krông Na, nkuăl Buôn Đôn, yuh Sáo Bun Trâm Adrơng an gĭt, năm aơ yuh bơi 30 năm, n’hanh lah kon bah rnăk wâl geh mê̆ lah nuĭh Lào, bơ̆ nuĭh Ê đê. Yuh săch nău kan ntĭm n uĭh pâl nđaih yor yuh ŭch dơi ndơ̆ jŏ jong ta ăp trong hăn tâm ƀon, nkoch đah khân pơng mpeh nău rêh, nău uĕh ơm n’hanh nău way ơm bah kônh wa dôl gŭ rêh ta lôk neh Buôn Đôn aơ:

“Geh tâm săk nơm 2 ntil dak mham Lào n’hanh Êđê, gâp lĕ săch nău kan ntĭm nuĭh pâl nđaih đah nău ŭch mpla nsơ nău uĕh ơm rnoi mpôl nơm tât âk nuĭh gĭt lơn. Tâm năm tât, gâp ŭch nkoch an ăp nuĭh âk lơn mpeh nău way ơm bah 2 rnoi nuĭh nơm, lơn lah rnoi nuĭh Lào, geh dŭt âk lễ, mô knŭng Tết Bunpimay n’hanh ăp lễ khay 6, khay 12 ăp năm”.  

Ta Buôn Đôn, nău nuĭh Lào sŏk nuĭh Bunong, Êđê dŭt âk. Khân pơng tâm rlŭk ndrel mpeh nău uĕh ơm, nău ngơi jêng dŭt jêr gay gĭt nuĭh tu tơm Lào mô lah nuĭh ta ntŭk. Nô Khăm Phon Lào, kruanh jrô kan Tuch tăm mât rong nkuăl Buôn Đôn, hội viên Hội hữu nghị Việt-Lào nkuăl Buôn Đôn an gĭt:

“Tâm rnăk wâl aƀaơ sŏk ur, gŭ sai jêng 7 rnoi nuĭh. Nuĭh Ê đê geh, Jrai geh, Hơ Rê geh, nuĭh Yuăn geh jêng lah rnôk mpeh rêh ri dŭt tâm rnglăp. Bah sông sa kho ao jêh nĕ nău ngơi geh âk ntil tâm nti nsum tâm nău uĕh ơm bah tĭng rnoi nuĭh. Kơp êng bah kon se mhe deh n’hanh têh ta ntŭk gŭ rêh Buôn Trí ri gĭt da dê bah 2 tât 3 ntil nău ngơi, geh âk nô blău ri ngơi tât 5-6 ntil nău ngơi ndrel”.

Wa Bun Mi Lào, năm aơ bơi 70 năm deh, gŭ rêh ta Buôn Trí B, xă Krông Na, nkuăl Buôn Đôn nkoch, bôl ăp nuĭh Lào rơh bôk năp trơn gŭ tât klôk neh Buôn Đôn lĕ sĭt đah u che, yơn ăp rơh bah kơi bâh nuĭh rnoi Lào ta xă n’har bri Krông Na hôm e tâm nthoi, wơt dơn, mât ndrăy ăp nău khlay way ơm uĕh lăng bah nuĭh Lào n’hanh rêh tâm rnglăp ndrel nău uĕh way ơm đah ăp rnoi nuĭh ta ntŭk jêng nău tâm rnglăp nar lơ rhăt jăp:

“Ta aơ ƀư sa dơh đŏng, jêh nĕ oh nô tâm mât tâm rgum, moh nău geh jêr jŏt tâm kơl ndrel, neh uĕh ri nuĭh gŭ. Nuĭh Lào, nuĭh Êđê, nuĭh Bunong, nuĭh Yuăn kơt oh nô du jay”.

Tĭng wa Phạm Trung Nghĩa, Kruanh UBND nkuăl Buôn Đôn, Buôn Đôn aƀaơ geh 29 rnoi nuĭh gŭ rêh nklăp 70 rbăn rnăk, tâm nĕ nuĭh Việt tu tơm Lào geh nklăp 300 nuĭh. Ăp nuĭh Việt tu tơm Lào gŭ rêh ta aơ dơi n’gâng kan ƀon lan ta ntŭk uănh mĭn tâm ăp ntil nău an kônh wa đăp mpăn nti nsơm, pah kan n’hanh tuch tăm hun hao wăng sa. Ăp năm, tâm rơh Tết way ơm bah nuĭh Lào, nkuăl ƀư da dê n’hanh di nău way ƀư.

“Nuĭh Lào gŭ rêh ta nkuăl geh 300 năm aơ. Bah meng ăp nău kơl bah Đảng n’hanh ngih dak ri nkuăl geh âk nău mĭn dŭt n’hâm đah nuĭh Lào ta ntŭk, m’hâm ƀư nta an nău rêh gay nuĭh ƀon lan dơi hun hao ta lôk neh bah nơm. Mpôl hên dŭt uănh mĭn tât ăp ntil pâl nđaih, lơn lah đah ntil pâl nđaih nău uĕh ơm bah ăp rnoi nuĭh, ri nuĭh Lào ta nkuăl Buôn Đôn lah ngoăy tâm ăp rnoi nuĭh êng, mpôl hên dôl nsrôih ƀư ăp nău uĕh nĕ gay nta an ăp nău uĕh ntĭt mpơl êng tâm rnôk hun hao pâl nđaih ta ntŭk”.

Ăp nuĭh Việt tu tơm Lào dôl rêh rgum tâm rnglăp ndrel đah ăp rnoi nuĭh êng ta lôk neh Buôn Đôn, jêng nău tâm rnglăp rjăp tâm nău rêh, nău uĕh ơm rgop đăp mpăn rnă njrăng chính trị, ntrôl hun hao wăng sa ta ntŭk./.