Ntŭk pĭch rluh ta nglă 3 trong Chu Văn An n’hanh Huỳnh Thúc Kháng, mpeh bah năp ngih kan du ngân hàng. Nô Đoàn Văn Hùng, nuĭh kan ngân hàng aơ an gĭt, tă nklăp 2 pơh, jêh ăp rơh mih têh, măt trong ntơm ntoh ăp têl đang n’hanh pĭt têl geh jŭr hao.

Nău chah đang, pĭch rluh nar lơ na nê̆ n’hanh aƀaơ lĕ jong rlău 50 mét, jru bah 30-40 cm, hvi nklăp 20-30 mết vuông n’hanh mô hŏ geh nău rlu. Nô Hùng rwê yor lvang đang aơ geh ƀư khuch âk, rnôk nking n’gang n’glă 3 du trong nkual têh âk nuĭh, geh n’ăp ngân hàng, ngih sam ƀŭt n’hanh nthoi đah nklang nkual ƀon têh Gia Nghĩa. "Rnôk pơng pŭk hôm pĭch rluh dâl ntŭk nkoe aơ, jêh nĕ mih jŭr lăp ri pơng ntơm dô̆t jong n’hanh hvi mpeh bah dâng sop. Trong đang ƀư ndeh mô dơi hăn, ŭch lăp ngân hàng an hăn rwăch; n’hanh hôm ta n’glă 3 ri 2 bôk ndeh ô tô mô dơi hăn du tơ̆. Mpôl hên mpŏng ăp gưl nău kan pă, nkra gay đăp mpăn ntung trong".

Jêh nău geh, UBND nkual ƀon têh Gia Nghĩa lĕ ntăm tôl mbơh, dŏng rse n’hanh n’gâng nchoeng n’gang lor lvang trong geh pĭch rluh. Bôk năp năl nkô̆ nău yor nkual djơh tâm di đah ntŭk rbông n’hoch dak djah ơm, ndâk ƀư bah âk năm bah năp. Rbông geh kol, tâm krêp lŭ jêt mô nâp mô dơi rdêng jâk, ƀư măt trong pĭch rlâm. Dak djah kol ƀư mpêh jâng neh, phah dăp bê tông chay, ntop đah mih têh ƀư nău lơ hô. UBND nkual ƀon têh lĕ jao an Jrô kan mât uănh nkual nkual têh mbơh ƀư nkra, gay đăp mpăn an nuĭh ƀon lan, ndeh rklư n’hanh ăp nău ƀư wăr nkual.