Thôn Nà Khau, xă Đồng Tâm, nkuăl Bình Liêu, Quảng Ninh ơm lah thôn dŭt jêr jŏt, nău wât bah nuĭh ƀon lan mpeh pháp luật hôm e dŭt đêt. Du đêt nău way hôm e rluk mâl. Yor nê, tâm rnôk nkoch trêng ta ăp thôn ƀon nkual prêh mâp mô đêt jêr jŏt. Tĭng yuh Nguyễn Thị Kim Oanh, công chức tư pháp xă Đồng Tâm lah:

Bôk năp lah mpeh nu nău nuĭh ƀon lan bah xă ri dŭt đêt. Tal 2 tay lah ƀon lan du đêt nău ngơi Yuan mô wât kloh, trong kan nkoch trêng ma cán bộ hăn tât thôn, ƀon, ăp ngih văn hóa nkoch trêng bôk năp lah kâp kruanh khu phố, kruanh thôn, ƀon rblang tay, mbơh tay an nkô̆ nău he an nkoch trêng an nuĭh ƀon lan ri khân pơng mư dơi wât ăp nkô̆ nău nĕ.

Ăp năm dăch aơ, trong kan mbơh rblang ntĭm nti pháp luật an nuĭh ƀon lan dơi gưl ủy Đảng, n’gâng kan ƀon lan xă Đồng Tâm dŭt uănh tât, uănh nĕ lah nău kan khlay, na nao. Xă ndâk ƀư rmôt nkoch trêng, mbơh rblang, ntĭm nti pháp luật, tâm rgop đah cán bộ thôn săch ăp trong ƀư nkoch trêng tâm di.

Phung mbơh rblang, ntĭm nti pháp luật nkuăl Bình Liêu lĕ tĭng ăp nău ntrŭnh, trong hăn bah Đảng, nău kơl bah pháp luật Ngih dak gay ndâk ƀư bôk nău kan, trong nchrăp mbơh rblang, ntĭm nti pháp luật tâm di đah nuĭh, đah ntŭk n’hanh nu nău wăng sa rêh jêng ta ntŭk, lơn lah đah ƀon lan rnoi mpôl đêt. Knŭng kơp 6 khay bôk năm aơ, ăp xă, nkuăl têh ta lam nkuăl lĕ ƀư 141 nar nkoch trêng, mbơh rblang pháp luật, đah rlău 11.000 nuĭh râng. Tă bah trong kan nkoch trêng, ntĭm nti pháp luật, nuĭh rnoi mpôl đêt ta lam nkuăl Bình Liêu lĕ geh nău rgâl kloh bah nău wât tât nău ƀư. Nuĭh ƀon lan lĕ nsrôih râng tâm ăp ntrong leo bah ƀon lan, ngăn lah bôk nău kan ndâk njêng thôn ƀon mhe n’hanh n’hŭch ach o nâp nâl. Wa Chíu Thanh Sáng, nuĭh ƀon lan thôn Nà Khau, xă Đồng Tâm lĕ an neh ƀư trong, nkoch: Knơm cán bộ nkoch trêng, mpôl hên wât trong ƀư Ngih dak n’hanh nuĭh ƀon lan ndrel ƀư. Mpôl hên geh trong bê tông hăn nsong dơh, tăch tơm n’ho, tơm keo dơi khlay lơn.

Uănh khlay trong kan nkoch trêng, ntĭm nti pháp luật ta ntŭk, lơn lah ta nkual jru ngai, Ban Dân tộc n’gor Lào Cai lĕ dŭt n’hâm tâm rgop đah ăp gưl, ăp nău kan geh âk trong mkra, trong ƀư na nê̆. Bah nĕ rgop n’hao nău wât, gĭt tĭng pháp luật tâm nkual rnoi mpôl đêt.

Rnăk wa Thền Mây Phấn, thôn Đội 2 ndrel hang rhiăng rnăk nuĭh Nùng ta xă Nàn Sán, nkuăl Si Ma Cai ƀa ƀơ dơi ăp nău kan dơi kan nkoch trêng mpeh Luật Njrăng n’gang ma túy, Luật ur sai rnăk wâl, nău kơl mkra neh gŭ, neh tuch tăm an nuĭh rnoi mpôl đêt n’hanh ăp nău ntrŭnh, nău kơl hun hao wăng sa. Tă bah nĕ ăp ntrong ƀư wăng sa, nău rêh bah ƀon lan nar lơ hun hao, oh kon dơi uănh mât rong nti nsơm nar lơ uĕh lơn:

Nău rêh bah he aƀaơ lĕ rgâl âk lơn bah năp, kon he an hăn nti lĕ rngôch, geh nău kan he mư an gŭ ur sŏk sai.

Wa Lồ Xuân Chô, kruanh jrô kan Dân tộc nkuăl Si Ma Cai an gĭt, knơm tĭng rjăp ăp nău ntrŭnh bah pháp luật, nuĭh ƀon lan lĕ nsrôih dŏng ăp nău kơl tâm nău ngăn nău rêh:

Ăp nău ntrŭnh, ăp nău kơl bah Ngih dak ndơ̆ tât ăp xă kơt n’har bri ri geh bôk nău kan rƀŏng tĭng lam dak hun hao wăng sa rêh jêng nkual rnoi mpôl đêt lĕ ndơ̆ an mkra du đêt, ntĭt nsa kơt dak dŏng an ƀon lan, pơk hvi ăp trong hăn thôn ƀon, dơh an tăch rgâl.

Mĭn lor nkoch trêng pháp luật tâm nkual rnoi mpôl đêt lah nău kan khlay, an dơi ƀư ƀa ƀơ, ndrel đah mbơh rblang pháp luật tă bah ăp rƀŭn nchră, ăp rơh rƀŭn n’hanh ta trong mbơh nkoch trêng, trong ƀư nkoch trêng pháp luật tă bah ăp rgum tâm rlong, tâm rlong mĭn joi gĭt pháp luật an ƀon lan nuĭh rnoi mpôl đêt dơi Ban Dân tộc n’gor ƀư lĕ nsĭt tay săk rnglăy na nê̆, kơl ƀon lan tâm nkoch, dơi nti tay âk nău wât pháp luật. Yuh Vừ Thị Sung, thôn Kin Sáng Hồ, xă Pa Cheo, nkuăl Bát Xát nkoch:

Ƀư tĭng tay nkoch trêng mbơh tơih ma xă mpôl hên njuăl tât tâm nar tâm rlong nar aơ lah mĭn joi gĭt, nti n’hanh tĭng pháp luật lah nău geh bah he n’hanh lĕ đah nău kan bah ăp nuĭh ƀon lan.

Kơp tât dŭt khay 6, lam n’gor Lào Cai lĕ ƀư geh rlău 1.000 rƀŭn nchră nkoch trêng, mbơh rblang, ntĭm nti pháp luật, pă an nău mhe; ƀư lôch uĕh Tâm rlong mĭn joi gĭt pháp luật an nuĭh rnoi mpôl đêt. Bah nĕ rgop n’hao nău wât, wât tĭng pháp luật tâm nkual rnoi mpôl đêt, ndâk njêng ƀon tơm đăp mpăn hun hao. Tĭng wa Trần Phùng, Groi Kruanh Ban Dân tộc n’gor Lào Cai:

Trong kan nkoch trêng âk ntil kơt nĕ tâm năm mhe rlău he gĭt da dê, nĕ lah nău tih pháp luật bah ƀon lan nar lơ hŭch, nău rêh jêng bah he nar lơ uĕh n’hanh ăp nău mbơh geh tât pháp luật, jêh nĕ nău ƀư tĭng nău kơl ăp nuĭh gĭt đŏng.