Ta rlău 1 ha neh mir bah rnăk wa Nguyễn Trung Đông, ta thôn Chư Ty 4, xã Đức Cơ, n’gor Gia Lai, ăp têl đang păch pêng nklang mir cà phê. Âk neh hŏ rhung jŭr, têk nkre tơm tăm. Wa Đông kơp geh lĕ ma rhiăng tơm cà phê hŏ geh khuch khat. Păng dŭt rvê têl đang dja hŏ ntoh bah âk năm bah năp nơh, yơn năm aơ têk jong tay, rêng hvi lôch ăp tơ̆ mih. Ndrel đah mir bah wa Đông, hôm geh mir bah 2 rnăk êng tâm thôn geh tâm ban kơt aơ đŏng, đah lĕ rngôch rnoh jong trong đang rhung rlâm lah 1,5km.

"Rnoh jru aƀaơ ta nklang mir nklăp 1 mét 2 hôm, mô hŏ gĭt mhâm blău nkra bah. Nchrăp tât khay klêh hôm ma mô nănh lăp tâm mir cà phê. Têl đang nơm geh reh cà phê nkrum jĭr tay, gâp mĭn mô rvê, tât jot ri rlâm tay. Pĭch rlâm sŭng lĕ bah dâng hôm, mô nănh jŭr ta mir đŏng ôh."

Lôch jêh ôp uănh bôk năp bah UBND xã Đức Cơ an saơ, nkual geh đang neh ta thôn Chư Ty 4 hŏ ntoh rhung êng tĭng ntŭk n’hanh geh ma nău rluh rlâm, khuch âk ha neh tuch tăm bah 3 rnăk ƀon lan. UBND xã hŏ nsih nkah njrăng lor nuĭh ƀon lan, lơn lah kon se, hôm hăn dăch tât ăp ntŭk đang n’hanh mô n’glăp ndeh rklư hăn kan tât ntŭk rluh rlâm. Wa Nguyễn Văn Tuyến, Kruanh UBND xã Đức Cơ an gĭt, xã hŏ geh siƀŭt dăn đă Sở Nông nghiệp n’hanh Môi trường n’gor Gia Lai năl nkô̆, n’glĕ nău tât khuch n’hanh rnoh klach rvê gay ntĭm nti lơi ir hăn luh kan n’hanh sơch trong nkra ƀư đăp mpăn.

"Nkual nê ntơm nơh nkuâl hŏ jă Sở Tài Nguyên jŭr uănh năl lĕ hôm. Mih njâr đah ăp ntŭk geh pă gâl, jŏ nar mih njâr bar khay mbro. Bôk năp nkoch trêng, rgŏ jă ƀon lan nkah njrăng lor: rnôk hăn luh mir dăch kêng nê dŭt njrăng uănh na nê̆, mô lap rlât jâng chôt tâm ntŭk nê klach rvê ngăn. Let năp tay, xã mbra mĭn uănh trong pâng nchih njrăng der lor ăp nău tât rmoh rmanh."

Pĭch rlâm, rhuh rhung ta mpeh Nhâp nar n’gor Gia Lai tât geh hô tâm bar pe năm aơ, lơn lah ta ăp xã Ia Krêl, Ia Ly n’hanh xã Gào, khuch tât lŏ, mir n’hanh khuch tât ntung trong. Wa Ngô Vĩnh Khánh, nuĭh dơi manh ƀư Chi cục trưởng Chi cục Thủy lợi n’gor Gia Lai an gĭt, đah ăp ntŭk pĭch rlâm ntêt nkri nkual ƀon lan gŭ, ăp ntŭk đă nsih wăr nkah njrăng lor, mĭn uănh nkra nâp uĕh tay mô lah ntrơn du nuĭh ƀon lan. Đah neh mir geh khuch khat, Sở Nông nghiệp n’hanh Môi trường hŏ dăn đă ôp uănh, nchih rgum na nê̆ gay ƀư ntŭk nsing ntop kơl.

"Aƀaơ, đah ăp ntŭk pĭch rlâm, Sở geh siƀŭt njuăl an ăp ntŭk tâm dâng mbơh nô nău khuch khat roh huach, nsing tâm nê mbra ntop kơl rdâk tay nău kan tuch tăm. Lôch rnôk geh khuch khat bah ăp ntŭk tâm dâng njuăl sĭt, Sở Nông nghiệp mbra rgum nkô̆ njuăl an Sở Tài chính gay nsing tâm nê tâm pă ntop kơl an ăp ntŭk rhŏ dŏng an nău kan tuch tăm."

Ndrel đah nău ntop kơl ta năp măt, nău uănh năl na nê̆ ăp nkual geh ma nău pĭch rlâm, rhuh rhung ta n’gor Gia Lai mbra kơl n’gor tĭng kơn joi trong nkra tâm di gay mât njrăng ntŭk gŭ n’hanh mir ba bah nuĭh nuĭh ƀon lan. Nê lah ntŭk nsing gay kônh wa đăp mpăn pah kan jan sa mir ba.