Ôi lơ 27/10, ta nkuăl ƀon têh Hồ Chí Minh geh nau ƀư du pơh tăch ntil ndơ OCOP ndrel ntil ndơ geh ueh ngăn bah ăp nkuăl. Nau kan aơ kơl an ăp rmôt kan, ntŭk tâm boh nau kan nsum, rnăk vâl tâm lam dak nthoi ƀư ndrel tăch rgâl ân săk tam. Du pơh ƀư ntil ndơ OCOP ndrel ntil ndơ geh kah ueh ngăn bah ăp nkuăl năm 2023 geh 439 rnăk râng, đah bơi tât 1.200 ntil ndơ, tâm nê geh OCOP geh 756 ntil ndơ geh ntơm 3-5 sao.

Tâm rnôk du pơh ƀư aơ hôm geh ăp nau kan pă jao nau blau nau mhe khoa học công nghệ kỹ thuật mpeh tuch tăm ndrel hun hao ƀon lan; pă trong nơih gay ăp rmôt kan nkuăl ƀon têh Hồ Chí Minh ndrel ăp n’gor, nkuăl ƀon têh joi uănh, ntuh kơl ăp bôk nau kan tuch tăm dŏng nau kan prêh, ndrel ma nau ê nkra jru ngăn ăp ntil ndơ tuch tăm geh tơm bah 38 n’gor, nkuăl ƀon têh. Bah nê, lah rjăp nau kan nthoi săk tam, ntrong ƀư kan tăch rgâl khlay bah nkuăl ƀon têh Hồ Chí Minh tâm nau kan tuch tăm bah ăp nkuăl tâm lam dak.

Ôi 27/10, ta Hà Nội, Ntŭk rgum ntrŭt nsôr ngăch tăch rgâl Tuch tăm mât rong, Bộ Nông nghiệp n’hanh Phát triển nông thôn kan nsum đah Văn phòng tâm pă nău kan ƀon lan mhe Trung ương, Hiệp hội ăp dak rƀah gĭt nău way ơm Việt Nam ƀư “Pơh lễ nkoch n’hơ, buăt nthoi ndơ sa Việt Nam an dak mắm way ơm, ăp  ndơ sa ntĭt êng mpeh nkual”.

Aơ lah rnôk nkoch n’hơ, mbơh gĭt mpeh nău nkoch ndơ geh ƀư, rêng ƀư njêng ăp dak mắm, mắm n’hanh ndơ sa lĭp bah dak mắm bah Việt Nam tât nuĭh dŏng sa kơl n’hao nău gĭt êng, mât ndray nău way ơm n’hanh ăp rup  uĕh văn hoá ntĭt êng bah Việt Nam tât năch tâm n’hanh bah dih dak. Pơh lễ lah nar kan gŭ tâm rêng ăp nău dơn kan bah bôk nău  kan gưl neh dak mpeh rdâk njêng ƀon lan mhe năm 2023, rgop ntrŭt ntrôl tăch rgâl, buăt nthoi tơm ndơ tăch mắm way ơm n’hanh ndơ sa lĭp bah dak mắm.