Du đê̆ Nghị quyết geh Quốc hội an dŏng ôi lơ 19/2, geh: Nghị quyết bâh Quốc hội mpeh nău ntrŭnh ntuh kơl rdâk njêng trong loih Lào Cai - Hà Nội - Hải Phòng, Nghị quyết rlong ƀư du đê̆ nău kan, nău kơl khlăy, na nê̆ gay ma hun hao trong loih nkuăl ƀon têh Hà Nội, nkuăl ƀon têh Hồ Chí Minh, Nghị quyết mpeh ăp nău kơl kan, nău kan khlăy ơm geh ntuh kơl rdâk njêng nău nchrăp kan điện hạt nhân Ninh Thuận, Luật geh ntrŭnh ăp nău way pháp luật rgâl mhe; Luật leo kan n’gâng kan ta ntŭk mhe rgâl, Nghị quyết ntrŭnh mpeh rmal du đê̆ nău geh tât pă dăp leo kan ngih dak, Nghị quyết ntop nău nchrăp hun hao wăng sa- rêh jêng năm 2025 đah nău ŭch hun hao geh tât 8% let lơ, Nghị quyết rlong ƀư du đê̆ nău kơl kan gay ma doh rklaih ăp nău kŏ văk tâm nău pah kan khoa học, công nghệ n’hanh rgâl mhe nău mĭn kan.

Bah năp nĕ, nar nđaơ 18/2, Quốc hội tâm nchră, nsơr ty mbơh an Nghị quyết bah Quốc hội mpeh dăp tay rdâk ƀư nău kan bah Chính phủ, Nghị quyết bah Quốc hội mpeh dăp tay rnoh nuĭh Chính phủ năm kan Quốc hội khóa 15 (nkra rgâl). Tĭng nĕ, dăp tay rdâk ƀư nău kan bah Chính phủ geh 14 n’gâng kan n’hanh 3 ngih pah kan tâm ban Bộ. Mpeh dăp tay rnoh nuĭh chính phủ geh 25 nuĭh geh Thủ tướng CHính phủ; 7 Groi Thủ tướng Chính phủ; 14 Kruanh n’gâng kan ăp N’gâng kan n’hanh 3 Groi kruanh n’gâng kan ngih pah kan tâm ban Bộ. Quốc hội lĕ uănh an săch tay wa Mai Văn Chính n’hanh wa Nguyễn Chí Dũng mât ƀư Groi Thủ tướng Chính phủ, 4 kruanh n’gâng kan dơi uănh an rơh aơ, geh: Kruanh n’gâng kan Bộ xây dựng Trần hồng Minh, Kruanh n’gâng kan Bộ Khoa học n’hanh Công nghệ Nguyễn Minh Hùng, Kruanh n’gâng kan Bộ Nông nghiệp n’hanh Môi trường Đỗ Đức Duy, Kruanh N’gâng kan Bộ Dân tộc n’hanh Tôn giáo Đào Ngọc Dung.