Kêng măng 30/10, ta ngih Quốc hội, Kruanh Quốc hội Vương Đình Huệ ƀư tơm rơh pah kan mpeh trong kan nchrăp ƀư ôp n’hanh ơh nău ôp ta Rơh rƀŭn tal 6, Quốc hội khóa 15. Tổng thư ký Quốc hội, Chủ nhiệm Văn phòng Quốc hội Bùi Văn Cường nkoch nău mbơh trong kan nchrăp. Tĭng nĕ, Quốc hội mbra an 2,5 nar gay ntơm ƀư ôp n’hanh ơh nău ôp.

Quốc hội mbra ntơm uănh nđôi nău ƀư tĭng ăp ngih pah kan đah 10 nghị quyết tâm năm kan khóa 14 n’hanh 15 mpeh groi nđôi bôk nkô̆ nău kan n’hanh ôp. Ntoh ngơi ta rơh pah kan, Thủ tướng Chính phủ Phạm Minh Chính uănh lah prêh nchrăp ƀư ăp rơh ôp n’hanh ơh nău ôp ta rơh rƀŭn tal 6, Quốc hội khóa 15. Jêh rơh ôp, tâm nchră ta nar pah kan aơ kơl joi trong ôp geh săk rnglăy ngăn, bah nĕ rgop n’hao tam, săk rnglăy nău kan n’hanh nsing nơm bah Quốc hội. Kruanh Quốc hội Vương Đình Huệ an gĭt, mpeh trong ƀư mbra ôp n’hanh ơh nău ôp tĭng 4 rmôt nău: Wăng sa rgum lĕ-têh hvi; wăng sa nău kan; văn hóa, rêh jêng; tư pháp, nội chính, kiểm toán Ngih dak. Mông an ăp rmôt nău nklăp 160 tât 170 mnĭt, yơn rnôk ƀĭt joet mbra geh nău ngăch tĭng nu nău ngăn.