Nar aơ (25/6), Quốc hội n’hơr ti uănh an dŏng âk trong nchrăp luật n’hanh mĭn uănh  pah kan nchrăp nuĭh kan, n’glêh an njêng Hội đồng Bầu cử gưl neh dak. Bah ôi, Quốc hội n’hơr ti uănh an dŏng 8 luật, lah Luật Thanh tra (rgâl nkra); Luật rgâl nkra, kơi ntop du đêt nkô̆ bah Bộ luật Tố tụng dân sự, Luật Tố tụng hành chính, Luật Tư pháp nuĭh mô hŏ druh ndăm, Luật nchrai nău kan n’hanh Luật nkra bah tâm rkeh, tâm dâl nău ta Nhih phat dôih; Luật rgâl nkra, kơi ntop du đêt nkô̆ bah Bộ luật Hình sự; Luật rgâl nkra, kơi ntop du đêt nkô̆ bah Luật n’gluh an dŏng siƀŭt quy phạm pháp luật.

Mpeh pah kan nchrăp nuĭh kan, Ủy ban Thường vụ Quốc hội mbơh Quốc hội mpeh nău rblang gĭt, djăt nău rgop đại biểu Quốc hội tâm nchră ta rmôt, lor rnôk Quốc hội n’glêh an pah kan nchrăp nuĭh kan mpeh n’glĕ nău dơi ma trong nklăch phiếu ndâp. Lôch tâm nchră ta rmôt, Quốc hội n’hơr ti uănh an săk nchih n’hanh ƀư sơch Kruanh Hội đồng Bầu cử gưl neh dak n’hanh pah kan nchrăp nuĭh kan êng ƀa ƀă mpeh n’glĕ nău dơi ma trong nklăch phiếu ndâp. Lôch rnôk sơch, Kruanh Hội đồng Bầu cử gưl neh dak mbra hao rblang dăn Quốc hội ŭch săk nchih Groi kruanh n’hanh Ủy viên Hội đồng bầu cử gưl neh dak.