Ƀư tay bôk nău kan rơh rƀŭn nchră tal 6, nar aơ 30/10, Quốc hội ntơm lăp pơh pah kan tal 2. Tâm nar aơ, ăp đại biểu Quốc hội lĕ tâm nchră ta hội trường mpeh nău mbơh ƀư ăp Nghị quyết bâh Quốc hội mpeh ăp bôk nău kan nkô̆ mpŏng rdâk njêng nkual ƀon lan mhe lvang năm 2021-2025,k n’huch ach o nâp nâl lvang năm 2021-2025, hun hao wăng sa- rêh jêng nkual ƀon lan rnoi đê̆ n’hanh gôl yôk lvang năm 2021-2030.

Tât dŭt khay 8 năm aơ, lĕ rnoh prăk ntuh kơl nsum pă prăk bâh 3 bôk nău kan nkô̆ mpŏng ngih dak lah 16 rbăn 300 rmen prăk, mhe geh bơi tât 48% nău nchrăp. Rnoh prăk pă an ê hŏ tâm di đah nău mpŏng kan, nău ngluh mbơh, pă prăk ntuh kơl hun hao tơm prăk trung ương mbrơi 6 khay bôk năm 2022 mhe pă jao, rnoh prăk đor lor bâh ta ntŭk mô tâm di. N’huch ach o ê hŏ geh nău mpŏng kan âk ding, nâp nâl, ngăn lah ta nkual rnoi đê̆, gôl yôk. Groi Thủ tướng Chính Phủ Trần Lưu Quang an gĭt, Chính phủ dăn đă đah Quốc hội rgâl rnoh geh bâh năm 2023 tât năm 2024 n’hanh đă ăp ntŭk mô dơn pă lĕ prăk ma nău ueh pah kan an geh mât đăp mpăn.